Skip to main content

Posts

Featured

Reyna Ti Ridaw

Tunggal sumangpetak ket malukagka
dardarasem ti bumangon
manipud iti naguldagam.
Mangegmo ti danapeg
daytoy aglaladut a dapan.
Daytoy ti ritual a namungayam.
Lukatak ti ridaw,
ket iti pannakabengatna
umasidegka a mangilagid iti bagim,
agpaapungolka!
Ti kudil iti nagbaetanta
isu ti rangtay tapno agkinnaawatan
ti agsumbangir a rikna.

Ngem sabali ita,
kawaw ti aglawlaw
makatitileng nga ulimek.
Apaman a naiduronko ti tarangkaan
Inurayko ti idadateng ti arimbangaw
manipud iti suli
a mangpaksiat iti anit-it ti bisagra,
sika a reyna ti ridaw,
ngem awan mangegak.

Itay bigat diak nasango ti nagpakada
Timmalawak a nakikinnamat iti ima ti orasan.
Mabalin iti panagtalawko
Kunaem a diak agsubli
Nakibinnilangka iti pigsa ti lawag
Nagtalawak ket nagtalawka
Nagtalawta.
Pinanawanta ti rikep
ta kunaem a di manglukat.
Sinungbatanak iti pugpugto a rikna.
Wenno nangsapulka iti baro nga aruangan?

Ngem kaskasdi nga agurayak.
Ti ridaw ur-urayenaka
sika a kas reyna
Agur-uray daytoy lasag a malagidan
Kalpasan…

Latest Posts

Solitario

Sika A Nakaiggem

Ti Agong Ti Aso

Ti Nakatallikod A Ladawan

Dagiti Ordinario Nga Aldaw

Baybay Met Ita

Solitario

Paralisado a Makina

Panangipasayag Ti Buteng

Komusta San Juanico!