ALLIYAH (Part 1)

A-Arasaas ti rabii sika nainaw
Iti diro't sam-it innayat a nawaw
Indayon ni ragsak awan patenggana
Rikna maysanmaysa nagrenda.

L-Likido ni ina ken ama nagkaysa
Ti bannogda di mapengga
Agkinnamat anges, angin ti barukong
Pudot ni bagi nga makapamauyong.

L-Lailo tunggal darikmat inda nagsawsawan
Iliw a di maisawang iti maysanmaysa di mamawmawan
Tapno iti maminsan pay patangkedenda
Ayat a nairungruna.

I-Iti pitik pusom naimula naisab-it
Sakbibi ni ina nagtalinaedam bi-it
Iti suli't lubong a nasip-nget
Sakroy, bassit a nailet.

Y-Yarig ka iti kasla bola
Agallu-allon, naatap a makarawa
Kugtarmo nasakit kano nu mangrana
Mangipakitat bin-i ken biag a naparsua.

A-Asidegen oras kayat mon ti rummuar
Diak ammo't aramiden unaen nga igaraw
Pidit-pidit ko lumamiis, ling-et ti agtedted
Nerbiyoskon diakon mailinged.

H-Husto agbannawag iti bente nueve ti Mayo
Idi adda bassit a sangit a mang-ngeg ko
Dagos ko nagyaman a napalagto
Maysaak nga aman, Diyos Ko!
2 comments

Popular Posts