MRT (Most unRepaired Train)

Marso 8, 2006 - 9:30 ti bigat

Agdardarasak nga nagna a napan iti estasyon ti train iti Ayala Edsa a terminal. Idi dumanun nak iti escalator, apo out of order kano. Nu diak agbiddut nasuruken a dua bulan manipud idi ipaskil da dayta. Awan ti pagpiliak nu di umuli iti nakangatngato nga agdan. Umanangsab da tao idi makadanunnak idiay ngato. Nagsyaaten nga eksersais. Gapu ta adda met store value a tiket ko dagussak nga pimmila kadagiti agpapa-inspect a linya. Apo ta di met magmagna ti pila. Kitaek ti pila iti adda iti kannigid ko nga umal-ala iti single journey tiket ket umaaddo. Idiay sango ti teller adda babai nga makididiskusyon, dagiti adda iti likudan ket tumanabutoddan. Uray siak ket nattangannakon a nakatakeder. Ag-alas diyes siguro idi adda inyawagda nga nadadaelan kano ket ik-ikaten da ti nakabara a train tapno makataray ti dadduma. Aginnem a tawen pay lang ti operasyon na daytoy ngem nakamanun a dadael. Gapu siguro ta aramid daytoy ti China. Nababa ti kalidadna.

Dagdagos ko ti bimmaba idiay Edsa tapno agtaxi-ak laengen. Adda gamin kamkamakamek nga miting iti kliyentek. Immulognak manen iti nakangatngato nga agdan. Timmangkennen ti butoy ko. Tinnalyaw ko ti EDSA, kasla paradaan ti kaado ti lugan.

Imbag laengen ta adda dagos taxi. KIA met ti tatakna. Sigen latta. "Boss Times St nga". Dagus a nag-wen ket naglungannakon. Trapik kunana, dina biniag ti metrona. Ngem nagkedkednak ket napilitan met laeng. Kayat na koma nga kontrataen ta trapik kano. Sige nayunak tu lattan nga inpaudi.

Agkalinduusannak ta napudot met ti taxi, agun-uni pay ti sangona. Dinamag ko diay kano fan belt ti aircon. Ti panunot ko, makadanun kam ngata.

Naglikko iti McKinley Road angingga idiay C5. Kanto ti Market Market. Nagpintasen ti dati a kampo ti Militar (Fort Bonifacio). Nagado ti maar-aramid a building a pag-opisan, pagpalpaliwaan, restoran ken condominium. Idebdebelop gamin ti Ayala ti dadduma a dagana. Maysa daytoy a pagal-alaan ti Taguig ti buwis. Kaddakellan ti Taguig iti kolesyon ti buwis iti amin nga siyudad ti Metro Manila.

Nagbuntog daytoy nalugannak a taxi, idi adda kamin idiay Libis naglikko iti U-turn sana pinataray iti kalsada idiay Greenmeadows limmusot idiay Temple Drive ket rimmuar mannen idiay EDSA ti kanto ti People Power a monumento. Imbag ta awanen dagiti agral-rally a papaanawa ken mangnayon iti trapik. Medyo met trapik bassit agingga idiay labes ti underpass. Isu met la gayam ta adda agtiltilliw nga taga LTO iti masakbayan ti Nepa-Q-Mart. Dida man laeng paigiden a nalaing tapno di agballangan iti kalsada.

10:30 ti bigat idi makadanun nak iti papannak. Immabot iti dua gasut ket tallo pulo pisos ti binayadak. Dagdagos ko ti bimmaba ta tantiyak ket naladawnakon iti patangan mi. Agatliling-etnak imbag laengen ta nagpasuyotnak ti bangbanglo. Isu ti agattibuur.

Sumungadnak pay laeng iti balay nga maar-aramid idi nakitak ni Carmi Martin kapatpatangna ti kliyentena. Imbag ta naka-isem. Alas diyes ti patangan mi nga agkita. Nabayagen a kliyentek ni Carmi Martin siguro agtallo tawenen. Maysa isuna nga Interior Designer ket nagturpos idiay Philippine School of Interior Design. Uray nu agar-artista kasla laeng met side line na daytoy pagdisdesign na nu awan kano iti taping. Haan a kasla kadagiti dadduma nga artista nga nu awan ti trabahoda ket awan ti sabali nga as-asikaswenda. Adda gamin iparpaaramid na nga silaw a para iti kliyentena. Ket kasapulan na ti tulongko tapno maidesign ti kayatda nu pay addan ti kayat da. Teknikal pay laeng met ti kitkitaen da ta dida met ammo ti dadduma a banag maipapan iti silaw.

Ag-alas onse y media idi malpas ti patanganmi. DAgdagos ko ti pimmanaw ken nagpakada. Naglugannak iti dyip a napan iti Quezon Ave a terminal ti train. Kunak nu di pay natarimaan. Ngem mayat met gayamen. Naguraynak iti train nga agsubli idiay Ayala. Apo namsek ti train a naggapu idiay North terminal. Nakatakder dagiti tattao ket napunnon ti tugaw, induroknak tay adda iti likudak. Binaybayak lattan ta kas kaniak ket agdardarras met. Medyo nabara ti uneg ti train. Gapu ngata ta addo ti tao wenno gapu ta summeren wenno gapu ta dadael ti airconda.

Alas dose ti malem idi nakadanun kami idiay Ayala. Nalpas man laengen ti gudua nga aldawko a medyo puro palpak gapu ken daytoy nga MRT.

Kasta a talaga ti biag nu maminsan kasla takkiag.
Post a Comment

Popular Posts