Biag ti Baro a Filipino

nakakatkatawa ti diar ti ordinario a Filipino. in-inot a bekbekkelen datayo ti govierno. gisgisaen datayo ti manteka a tumrem kadagiti nagbannogan tayo. awanen wayawaya iti kunkunada a maysa kadagiti demokratico a pagilian iti sangalubongan.

adda manen pangar-artiok ti govierno nga inrusatda kadaytoy napalabas a lawas. ammo tayo a ngimmato manen ti balor ti LPG ket ti nakita ti govierno ket ti pangitedda kano iti diskwento nga ibunongda. kasla man agparaffleda ta nu sinno ti makabunot ti naswerte a tiket ket iso ti umis-isem ken aglak-am ti gracia. di met sapasap tapno ti intero a pagilian ni Angkuan ti aglak-am.

kastoyman idin ti inaramidda iti napili a paset ti Metro Manila. agibunnong da iti Food Stub kadagiti tao. a kasla man dagitoy ket balod. matiptipid ti racion, nasisiyaat sa pay tay mapan makipunsion ta mapnekka a mangan. adda pagpiliam a sidsida.

kasano met ti posision dagiti nakaragpat ti hustisia ngem kadaytoy laeng Abril ket naminpinsan a pinasag ti govierno ti namnamada koma a makabales ken makagun-od ti naan-anay a simbeng ulimek ti panunot. imbabawi ni GMA ti pannakabitay koma dagiti balod nga adda iti death row. angingga kano nga adda isuna iti takemna ket awan kano ti mapasamak a bitay.

kasta manen ti nakapay-an ti maysa a Filipina a rinames kano dagiti soldado a kameng ti Balikatan idiay Subic. imbes a suportaran koma ti govierno, saan ta kasla man iparparupa ni Sec. Gonzales nga awan ti namnamada nga agballigi. tapno maipangabakda koma met ti kaso. maysa a Filipino naidadanes iti bukodna a pagilian. tapno di laeng mamulitan ti relasion ti Filipinas ken US, isakripisioda ti maysa nga ordinario a Filipino. Inlakodan ti karbengan tayo iti timbangan ni babai a nakaabbong ti matana. kasukat daytoy dagiti basura nga umayda ibelleng ditoy pagilian tayo. iti immuna a panagparang dagiti suspect ket maipakita a kasla man nataraken dagitoy a baboy iti uneg ti US Embassy. Limuklukmeg ken bimmusbusnagda. kasta kadi tay balod a kunkunada. apay a dida koma ipaima dagitoy iti Filipinas ta lak-amenda met ti trato dagiti balod ditoy. tay balatong nga innaldaw nga awan ramramanna.kitan tay man nu dida ket makurintinas.

kadaytoy laeng anibersario koma iti People Power ket inyetnag ni GMA ti Estate of Emergency iti intero a pagilian. maysa a gannuat a nangpaburek kadagiti dadduma a Filipino ket nagsipudan ti panagpungtot dagiti dadduma a kameng ti Militar a di kaya ni Gloria a pasuksokan. Agdadata a takrot daytoy a babai ta amangan nu gamrutenda ti tugawna. kabutengna ti bukbukodna nga anniniwan. maipawil ti agrally nu awanakat' permit. apay ket nailanad a nalawag met idiay konstitusion tayo a paset daytoy iti karbengan tayo a kas umili. iti pangibutaktak kadagiti ammo tayo a dakes nga aramid. ania ti inubrana? pinagunayna dagiti robot a taona. CPR ti panglabanda kadagiti ralista a di agparbeng kadagiti kayatda a mapasamak. Libre digos nga awan sabon. imbag laengen ta kadaytoy napalabas nga aldaw ket kinontra ti Kangatuan a Korte ti legalidad daytoy. Ti Proclamation 1017 ket kinedngan da nga unconstitutional. imbag ta adda pay dagitoy a klase ti tao nga ti magatadan ti kuarta.

addo pay ti aramid ti govierno a pangidadanes iti biag ni Filipino. agtultuloy latta ket di tay ammo nu kaano a malpas. nu kaano nga maungaw ti panagsagaba ni Angkuan.
Post a Comment

Popular Posts