Dagiti Kubbo ti Barrio Ignacio

iti ngarenget kumpay
a maipakan
tunggal pinuon pagay
a mapasag
kinelleng kasapulan
a mairingpas
iti dagaang init
a kuminnit lasag
kadagiti agtedted
a ling-et
tumrem iti kada garawko
dumigos mawaw
a pelles
adayo pay ti pungto
a gapasek
ket kasla man lumumba lumba
dagiti gatel amgid
a maisaplit
iti rupa nu tunggal idumogko
ket petpetak,
iyagawak
nga ipungsay
manipud iti bumalbalitok
a dawa
payabyab
nga itayab angin
a mangdennep rungsot
sang-aw pudot
mailumlom sakak
anginggat sellang
ket ikuy-ad ko
tapno madaerrak sala
dagiti kadduak
ta uray pay
bukibokennak sugat
kadagiti ramay a maimilkat
diaktu agpangaddua
a mangpaksiat tinaltal
a garem-garem
itapal nakanganga
a sugat
ibturak apges
itured likido ni ilokano
a sumayasay
ah! nalpasen sinilong
a gapasen
reppeten nakauldag
a pempen
tambak a sidadaan
mangibatbatan kinerker
mariknak kettang siket
ragutok dagiti ramay
a nakaimuntaran
kalyo a nakabenggasan
saksi ti mumalem
wen, ibaklay ko dagiti tinumbo
tapno ideretso nakaisem
a baskula
a manglaklakat' bannogmi.



abril 11, 2006
ibj, lasam, cagayan
2 comments

Popular Posts