Jueteng idiay Cagayan

Iti kaaddak idiay Cagayan naklaatak ta adda maysa a babai nga agpassiapasiar. Adda iggemna a papel a kasla iti pagsuratan ti grade four ngem nagitte-gitteng. Adda bagna a bassit ket nakabaredbed iti sibetna. Iti bangir nga imana ti bolpen a pagsursuratna. Madamdama pay ket inasitgannen dagiti kaaruba daytoy a babai. Agkalkalaggen dagiti dadduma. Ket tay maysa imbaganan ti tayaanna a numero. Agpatpataya gayam ti jueteng daytoy. Napaisemmak ta uray siak ket al-alukoyenna a tumaya. Winiwingak ket bulonkon ti simrek ta innakman lumidok ti danum. Nadagaang ti panawen. A kas kapudot 'tay babai nga ar-aribungbunganda.

Nadamag ko laengen ti maysa a kaarubami nga agtultuloy kano latta daytoy uray pay idi inrusatten ti gobierno ti labanda kadaytoy a sugal. Ti adatna gangani iti intero a Cagayan ket adda jueteng. Idiay Lasam ken Gattaran laengen, agkaiwara dagiti kubrador.

Daytoy kadi ti ipangpangas ni dati a Mayor ti Puerto Princesa, Palawan Edward Hagedorn a naparmekdan ti jueteng. Ket inrepreportna payen kenni GMA. Ningas cogon sa laeng met ti ar-aramidenda? Kastoy awanen ngem madamdama dadta manen.

Di laeng nga iti Cagayan, ta pati kano idiay Ilocos ken Central Luzon ket agtultuloy latta ti bolada. Nadamagko kadaytay asawa ti kasinsinko nga immay nakigapas a madama latta ti operasionda idiay Ilocos Sur. Ket idi laeng kalman nabasak met iti PDI nga idiay Central Luzon ket adda met latta jueteng.

Di kadi ammo ni GMA daytoy? Wenno agindidi ammo met?

Ammotayo nga adda dagiti politiko a mangsupsuporta kadagitoy. Ganganiman ngaminen ti eleksion. Apo makonsensia kayo met alla.
Post a Comment

Popular Posts