Oligarsia

Oligarchy - government by a few; a state so governed.

agngangabiten ti anges ni namnama
a linangeban kinamanaginkukuna
iti bakir a pagarian dagiti eletista
a didiosenda't balitok ken pirak...

napananen dagiti pammilin ni sari-ugma
a nainsinginan sapata't puli
tapno gudasenna't padeppa dagiti taga laud
a nannubbot naispasngay a wayawaya...

daytoy kadi di bugas ti dir-i
dagiti dara a naibisibis daga
daytoy kadi ti ili a tinagibi
dagiti bannuar nga ammami...

amok naungawen daydi pangta
a ginibusan dagiti kari
ngem apay a bumallaballaet pay laeng
dagiti batibat a di maiwaksi...

agtultuloy latta't sagaba dagiti nairurumen
agallangugan latta't himno pannakaidadanes
rumobrob latta't risiris dagiti sangi
a makarikna't pannakaupay...

tagtagibassitenda latta't timek ti kapanagan
dagiti tignay ti taga bantay ken aw-away
nailupitlupit latta't annay dagiti taga baybay
dagitoy a mangsilsilpo't anges ti kaputotan...

ti tunggal karbengan adda kadi kaibatuganna
ti gatad awis kumalingking a sinsilyo
dayta kadi ti tangdan ling-et panakaadipen
agserbi, agkurno kadagiti berdugo...


may 23, 2006
signal village, taguig city
Post a Comment

Popular Posts