Paranoia

agbagtittak ta kunak kadagiti tao
awanton daga a tagikua-enda
awanton ulimek a rumsua
awanton timek a maipangta
awanton sarita a pangipagudanda.

agbagtittak kunanto dagiti tao
ta kunakto kadakuada
umayto dagiti bisin kararua
umayto patingga't pammati
umayto pannakaunas puli.

agbagtittak kunadanto amin
ta agpaggaakakto iti sanguananda
sika a nkatugaw, agkarayamkanto
sika a manangallilaw, maiyaw-awankanto
sika a managgundaway, agpullokanto.

agbagtittak sawento't amin a tao
agpatingganto't tukar sonata
agpatingganto't kurengreng kutibeng
agpatingganto't aren-eng samiweng
agpatingganto't lung-ay lallay.

agbagtittak wen patiendanto nga agbagtittak
no isangitkonto ti katawa
no ti ragsak iladingitko
no ti agpayapay a malem igawidko
no ti bannawag kabutengko

wen agbagtittak!


may 22, 2006
signal village, taguig city
Post a Comment

Popular Posts