Agua de Pataranta

kumalawikiw nga awis ti agpaypayapay a sarming
dagiti naipupok nga espiritot’ linammat’ nagsaraan
manglilipot manggargari a burayok ni pannakalipat
a pagsakduan kupkupikopan a kinatured
dagiti takrot a nailikmot iti temtem
iti lidok agayos a bagi ti nalinnaawan a danum
iti natikagan a bibig ken karabukob a nakaraman
sumukmon iti birtud ti naidasar nga atang
kadagiti paggaak nga agpalla-ilang iti tangatang
ta dumurog ti maur-uram a lasag…

ti adipen nagari kadagiti simimsim iti diro
naisangsangayan a rinnupak dagiti aggiinnala a dila
ti agilunlunod nga ikikita ti agtutoglep a mata
a maibasingbasing iti tay-ak agkiamkiam a panunot

tumayab dagiti dapan a sumuknal iti kangatuan nga agpang
ti agnguy-nguy-a a riknat’ kawaw a darikmat
pumosing ti simbeng ti naintaw-an nga estraktura
ta ngumernger ti alintatao ti animal a dara
ket guyudenna iti abot pannakaidagel…

may 31, 2006
signal village, taguig city

Post a Comment