Kadagiti padak nga agimulmula!

Daytoyman tay impatulod ni Manong Cles kaniak itattay laeng. Kadagiti mayat a makisalip basaen tay man biit daytoy...

------------------------------------------------------------------------------------------------------------

Salip iti Sarita ken Daniw iti Iluko ti KWF, naluktan

Naluktan itay nabiit ti Gawad Komisyon 2006, salip iti panagsurat nga esponsoran ti Komisyon sa Wikang Filipino (KWF) mainaig iti pannakarambak ti Buwan ng Wikang Pambansa (Agosto 1-31, 2006).

Malaksid iti lengguahe a Sugboanong Binisaya (Cebuano), naluktan ti salip para iti lengguahe nga Iluko iti benneg ti sarita ken daniw. (Naluktan met ti salip iti salaysay para iti lengguahe a Filipino. Topiko: "Ang buwan ng wikang pambansa ay buwan ng mga wika sa Pilipinas" wenno maiturong iti kinaadu dagiti pagsasao ken iti kinaadu dagiti kultura iti Filipinas. Kaatiddog: 15-30 a panid.)

Dagiti pagalagadan:

1. Nasken nga orihinal ti pakisalip, di naipatarus manipud iti ania man a lengguahe, di nangabak iti ania man a pasalip iti panagsurat, wenno di pay naipablaak iti ania man a pagbasaan.

2. Saan nga ilanad ti nagan ti autor iti entry. Ilanad ti nagan, adres ken dadduma pay nga impormasion maipanggep iti autor iti porma (form) a maala iti KWF. (Mabalin nga i-download ti form iti website ti KWF iti http://wika.pbwiki.com/ wenno maala iti opisina ti KWF). Nasken a manotarioan ti form.

3. Siwawayawaya ti autor a mangpili iti topiko a tamingenna iti isalipna. Para iti sarita, agatiddog ti entry iti 10-20 a panid; para iti daniw, buklen ti pakisalip ti 7-10 a daniw. NASKEN a naikompiuter (font 12 Arial) dagiti entry iti doble espasio iti 8-1/2 x 11 a bond paper, ken addaan iti ‘margin’ a maysa a pulgada iti ngato ti panid.

4. Idatag ti entry iti uppat a kopia a hard copy ken maysa nga electronic file (naka-diskette).

5. Mapalubosan ti autor a mangidatag iti maysa nga entry iti kada kategoria.

6. Dagiti premio iti tunggal kategoria: Umuna a Gunggona, P15,000 ken tropeo; Maika-2, P10,000 ken plake; Maika-3, P8,000 ken plake; ken tallo a Pammadayaw a Gunggona, P2,000 ken sertipiko.

7. Ipatulod wenno personal nga idatag ti pakisalip itoy nga adres: Komisyon sa Wikang Filipino, G/F Watson Bldg., 1610 Laurel St., MalacaƱang Palace Complex, San Miguel, Maynila, tel. 736-3832. NASKEN a maawat ti KWF amin a pakisalip agingga iti 5:00 PM ti Hulio 28, 2006.

8. No ipatulod ti entry babaen ti email, i-attach daytoy iti format nga MS Word document, agraman ti na-scan a nasungbatan ken napirmaan a pormulario (form) ti KWF. Nasken met a maawat ti KWF ti entry ken pormulario iti di naladladaw ngem 5:00 PM ti Hulio 28. Ti email address a pangipatulodan iti entry ken pormulario: gawad_kwf@yahoo.com.ph. Ipatulod met laeng ti orihinal ti nasungbatan ken napirmaan a pormulario iti KWF. NASKEN A MAAWAT TI KWF DAYTOY ITI DI NALADLADAW NGEM MAKALAWAS KALPASAN TI DEADLINE TI PASALIP.
Post a Comment

Popular Posts