Prose 95 - Tuleng

agwanwanengweng ti kasla naitubong a timek
ti balikas a maipullat iti lapayag
ta kasla angin a bumanesbes
dumaw-as sa lumabas ket lumsot iti bangir
agallangungan dagiti sarita a di maawatan
ta itayab ti umel nga ulimek
ket kasla man awan nangeg...

malagipko daydi billit-tuleng
a nagbatay kadagiti dawa ti pinagayan
inabogko, binarsakko!
ngem kaskasdi a dina inkir-i
dina inkankano ti tagari
a pinarnuay ti bingkol
a nagdisso iti sanguananna
ta bulsek sa...
wenno tuleng?

natubongan ti danum ti lapayagko
ken agayos ti nabara a likido
daytoy sa ti rason no apay a nagbara
dagiti durek a naimilkat iti wangawanganna!
Post a Comment