Metro Manila State of Calamity

Kalpasan ti mano nga aldaw nakalung-aw met laeng da tao iti didigra nga inyed ti Bagio Milenyo. Tallo nga aldaw nga awan ti danum ken kuriente ket inan-anusan ti kingki a pagsilawan ken agraman agong a ngumis-ngisit (adda shortage ti candela) pati rasion ti danum ket paggiinnagawan ti tao.

Bigat ti Huwebes ket simrekak pay laeng tapno asikasuek ti projectko sadiay Peninsula Hotel. Itirtiranan ti tudo ngem agsardengsardeng. Nakullaapanen ti tangatang ngem awan pay ti tudo. Alas onse ti bigat idi inkeddeng ti bossko a pagawidendakamin ngem dadtan ti bayakabak ken angin a sumiwetsiwet. Agkudredkudrepen ti silaw.

Inkeddengko pay laeng ti ag-malling tapno palippasen ti bagio ngem mangrikrikepen ti Glorietta ket SM Makati laengen ti nakalukat. Simmalipengpenggak kadagiti paglakuan ta makitak iti ruar urayna la itayap dagiti signboard ket dagiti kaykayo iti natulid da aminen.

Apaghusto nga ala una ti malem idi ipeggesna ti angin. Kunakno likkabenna dagiti atep ti MRT. Awanen ti agbiahe a lugan.

Idi nakalabas ti bagio inkeddengkon ti agawid uray no kumalimbitinen da tao iti Bus. Nakakaasi tay maysa a nalabsanmi a lugan. Natupakan iti billboard ket uray la narimrim-it. Ti expressway maysa a linia laengen ti malasatan ta nakaballangan dagiti kayo iti kalsada. Kadduan dagiti billboard ti immagep iti daga. Ket dagiti poste ti kuriente a sementado nattuang da amin. Napugsat dagiti kable.

Imbag ta di natupakan ti timmayab nga atep ti karrubami tay terrace ti ab-abanganmi nga apartment. Dakkel koma a trabahok. Agraman katre ti karruba timmaytayab.

Kinabigatanna di kamin simrek ta ti intero a Manila ket awan ti power. Iti unos ti nasurok lima a tawenko ditoy Manila ket nakitak met aminen ti inyed ti bagio ditoy ngem grabe daytoy Bagio Milenyo ta itak laeng a nakita ti kastoy nga inyedna a sagaba.

Pati ATM ket pillienda ti bangko. Tay BPI nga accountko dida man awaten (naka generator dagiti bangko idi biernes) ditoy FTI Complex. Ken uray kadagitoy aglokoloko ti signal ti selpon. Nagrigat a tiempuan agpukawpukaw.

No koma adda kudeta iti Malakaniang di mi koman naam-ammuan ta awan met pagdenggan iti damdamag. Nasayaaten koma ta maipadada iti napasamak idiay Thailand.

Ket itay laeng parbangon a naaddaan kami iti kuriente ken danum. Back to normal ti biag. Agraman ti ramramit ket gimmanadan. Timmagari ti aglawlaw.
Post a Comment

Popular Posts