Skip to main content

Posts

Showing posts from October, 2006

Prose 87 - PAGUNIANNAKTO

Maysa a daton a daniw iti agpaypayapay a malem!

---------------------------------------------------

Pagunianakto no agkippet dagiti bulong ti katuday
Iti malem nga agpalaud dagiti kannaway
Ket maakas ti lawag iti linged ti kimleb a bantay
no akupenen ti angin ti dapo ti napuoran a garami
ken sibuganton ti arimukamok dagiti nanglaylay a barsanga
ket agukradto metten dagiti sabong ti kabatiti iti minuyongan…

Pagunianakto no diamton masirayan ti isem ti bigat
ti tumangkayag nga init manipud iti daya
tapno lukaisanna ti laladot ti agpatnag
ket no diamto payen matimud ti taraok ti darisayen
a mangririing kenka iti ngayed ti agsapa
tapno sanguem ti nakasaang a kebbakebba.

Pagunianakto no diamton maiyunnat dagita gurong
Tapno makikinnamat kadagiti agbettak a dalluyon
Ket no diamton mailasin dagiti rupa ti appokom
A kinamkamatmo agingga kadagiti tambak ti buyon
Iti pangta ti burrarawit ken laaw ti pungtot.

Pagunianakto no diamton masalidaan ti bukot ni Kalakian
Tapno inka iwayway iti agaw-awis a kapan-awan
Ti kat…

From Cagayan to Cagayan de Oro

Maysa a panagpasiar iti disso ti Cagayan de Oro. Daytoy ti umuna a panagaddakko iti depaar ti Mindanao. Uray no dua aldaw laeng ket dinto magatadan iti kuarta ti padasko.



Sango ti bangko a kinabitanmi iti silaw.

Ti kuarter dagiti empleyado ti Del Monte.


Ti plantasion ti pinya iti Del Monte, Bukidnon. Arintudduen pay ketdi. ken nadam-eg ti daga

Ti ospital ti Del Monte
Maysa pay a kuarter dagiti agtrabtrabaho.



Maysa a werhaus ti Del Monte

Garden of Malasag, maysa a tartrawidwidan ti Department of Tourism



Maysa a balay dagiti Malasag.
Maysa a buya ti Cagayan de Oro no addaka iti pantok ti Garden of Malasag.


Ti naglugannami nga eroplano.



Dapandapan

“SIGE, Ading, yiddekmo pay,” inmandar ni Manang Rose iti babai a pugot. Immasut iti nauneg nga anges ti babai sa pinagarutanna. Dandanin makaruar ti kagudua ti bagi ti maladaga. Agtigtigerger dagiti ima ni Manang Rose. Naslepen ti badona iti ling-et. Napuritakanen iti dara dagiti imana. Inin-inayadna a ginuyod ti maladaga ket binurak ti sangit ti maladaga ti limteng nga ulimek iti dayta nga aldaw a dinanggayan ti anangsab ti babai.Nakalupkopan iti supot ti maladaga. Maris lap-ok ti bantay ti kudilna ken agallo-allon ti buokna.

“Babai, Ading!” Immisem ti pugot nga ina. Nagparang dagiti limmadugan a ngipen a gapuanan ti bua. Napaksuyan gapu iti panagpasikalna.


Nakita itay ni Manang Rose a nagsanggir ti babai a pugot iti puon ti mangga iti di nabakudan a solarda. At-atibayen ti asawana. Agil-ilus gapu iti sakit. Immarayat ni Manang Rose idi mangegna nga agiriak. Kurangna laeng karab-asanna ti puon ti mangga. Dinamag ni Manang Rose iti lalaki a pugot no ania ti mapaspasamak. Di nagtimek …

Metro Manila State of Calamity

Kalpasan ti mano nga aldaw nakalung-aw met laeng da tao iti didigra nga inyed ti Bagio Milenyo. Tallo nga aldaw nga awan ti danum ken kuriente ket inan-anusan ti kingki a pagsilawan ken agraman agong a ngumis-ngisit (adda shortage ti candela) pati rasion ti danum ket paggiinnagawan ti tao.

Bigat ti Huwebes ket simrekak pay laeng tapno asikasuek ti projectko sadiay Peninsula Hotel. Itirtiranan ti tudo ngem agsardengsardeng. Nakullaapanen ti tangatang ngem awan pay ti tudo. Alas onse ti bigat idi inkeddeng ti bossko a pagawidendakamin ngem dadtan ti bayakabak ken angin a sumiwetsiwet. Agkudredkudrepen ti silaw.

Inkeddengko pay laeng ti ag-malling tapno palippasen ti bagio ngem mangrikrikepen ti Glorietta ket SM Makati laengen ti nakalukat. Simmalipengpenggak kadagiti paglakuan ta makitak iti ruar urayna la itayap dagiti signboard ket dagiti kaykayo iti natulid da aminen.

Apaghusto nga ala una ti malem idi ipeggesna ti angin. Kunakno likkabenna dagiti atep ti MRT. Awanen ti agbiahe a lugan.