Tabuan Market

Ti Cebu ket am-ammo gapu kadagiti produktoda a kas iti otap, dried mango, chorizo, danggit, gitara ken kdpy. Gapu ta adda kamin iti lugar dagiti Sugbu dimi met pinalpas daytoy a gundaway tapno gumatangkam metten iti ipasarabo kadagiti gagayyem ken kapamilya.

Immuna a napananmi ti Tabuan Market. Maysa a mercado dagiti naibilbilag nga ikan. Ditoy ti pakakitam kadagiti tagilako a naipataraigid iti agsumbangir a kalsada. Abunaw a talaga ti ikan ditoy. No koma idiay Sinait pinakabawbawangda met daytoy. Adu ti pagpilliam iti agduduma. Mabalinmo met ti agcanvass no sinno ti kalakaan. Ket ti maysa nga istratehia tay naggatanganmi ket pinaramanna kami iti naluto ket ania pay garud ti naaramidanmi no di ditoy ti naggatanganmi iti iyawidmi. Maysa pay daytoy ti kalakaan a nagdamaganmi iti presio.

Dagiti dried a laki ket naggapu kano iti Bantayan, tay medio naingpis ti langana a pamudawen sa dakdakkel. Dagiti met paatiddog ken babbabassit ket idiay kano Bohol. Hmmm! iti bangir laeng gayam nga isla.

Nakagatangak met iti perlas nga aritos. Inpilpilit tay maysa a Mangyan. Tallo ti singkuenta.

Sige kaddua-endak man ketdi aya nga agtawar!

Ti nabunbuntuon a tagilako a kitkitan dagiti kadduak.
Naipreserba a makan a kas iti dried mango, durian candy, otap, suka, pulboron kdpy.
Agduduma a klase ti dried fish ken sea products.
Ti naikuadro a ladawan ni PGMA. Gloria kayo dyan hehehe. Imbag ta adda gumatang.

CEBU Escapades

Kasla addaak iti sabali a pagilian. Diak maawatan ti saritaanda. No adda man bilang medio agkaarngi da laeng iti Tagalog (Filipino?). Pinadasko a kinasaritada ida iti Tagalog ngem agmalmalanga da iti ibagbagak. Sungbatandak iti bukodda a lenguahe. Maysa a napaliiwko a talaga a nagsaknap iti intero a Sugbu ti pagsasaoda. Dagiti taksi drayber dida met unay makasao ta dagiti laeng nakapan wenno nakaaddak iti Manila ti ammona nga agsao iti Tagalog. Uray dagiti nababaknang awan ti agin-tatagalog wenno agin-iinglis kadakuada.

Nadalus ketdi ti Cebu ta dagiti taksi ket kaaduan agus-usar iti LPG. Iti panagdamagko iti maysa a drayber 40 a porsiento kano ti matiptipidda. Dakkel daytoy a kita para kadakuada. Ken makatulong da pay iti aglawlaw.

Naulimek ti Cebu ta uray iti tengnga ti rabii adu pay laeng iti agpagnapagna kadagiti kalsada. Adda tay nangananmi nga igid ti kalsada ket napunpunno iti tattao. Street food kunam ngem adu met ti nakakotse a mangmangan.

Di pay napukaw ti kulturada ta agingga ita us-usarenda pay laeng ti pusok. Maysa nga innapuy a nabungon iti bulong ti niog. Adda pay tay maysa a lakay nga agkutkutingting iti arpa.





Bayat ti pannanganmi iti igid ti kalsada. Im-imasen tay kadduak ti natuno a blue marlin ken kudil ti manok a naibabad iti suka ti tuba. Iti likudna ti maysa a lakay nga agkutkutingting iti arpa. Naglamuyot a denggen.

Ti naiplato a makan.

Ti nakabitin a pusok. Kasla sinambong ti Ilocano. Ngem puro nga innapuy laeng daytoy.

Ti igid ti Unibersidad ti San Carlos. Maysa a prominente a pagalan iti siudad.

Ti bersion ti dyip dagiti Sugbu.

Ti di pay nalpas a Cebu International Convention Center. Masarakan daytoy iti paset ti Mandaue Reclamation Area.

Ti proyektomi nga otel (Cebu Midtown Hotel)

Ti nakalawlawa nga Osmeña Blvd.

Sinno ti di makaammo kadaytoy? Ti Sto. Niño Shrine.

Lemlunay



Diak man ninamnama nga adda masukainak a libro ti maysa nga ilocano iti daga dagiti Sugbu. Bayat iti panagpasiarko iti Ayala Center idiay Cebu sinerrekko ti National Bookstore sadiay. Dagussak a napan iti Literature Section. Ket naklaatak iti nakitak nakatakder iti bookshelve ti libro ni Apo Herminio S. Beltran Jr. Daytoy tay Lemlunay a libro. Collection daytoy ti English, Tagalog ken Iluco a daniw a naipablaak idi 2003 babaen iti UP Press. Ginatangko tay maysa ta awan ti kastoy a makitak ditoy Manila.

Ti maysa a pagsiddaw apay nga awan ti kastoy a magatang sadiay Norte wenno ditoy man laeng Manila. Apay nga idiay pay Cebu ti ayanna, nga ammo tay met ket kaaduan ken Bisaya ti pagsasaoda.

Super Experience

Damok iti lumugan iti barko! Maysa a padas a gagangay laengen kadagiti taga Visayas ken Mindanao. Diak koma kayat ti aglugan iti barko ta maamakak gapu kadagiti ginasgasut a pagteng iti taaw ngem inkapilitan ta adu ti kargami ket di met kaya ti eroplano nga ilugan ti chandelier. Nagdakkel gayam ti Super Ferry 17 ta kompleto iti ammenities iti uneg. Adda foodcourtna, bar, cafe, playing house para iti ubbing parlor, computer shop ken convenience store. Pinilik iti Business Class tapno naulimek ken di komportableak a makaturog. Daytoy Business Class ket adda bukodna a TV ken lavatory. Mayat ti kutsonna ken airconditioned.

Makadukot met gayam iti uneg isu a rimmuarak a napan iti kangatuan a deck. Manipud ditoy nalawag a makitam dagiti isla. Ta agtayag daytoy a barko iti kasla 4-6 a kadsaaran a pasdek. Naannayas ti panagdaliasatmi ta awan ti bagyo. Dagiti allon a kasla bumisbisong iti higante a landok.

Ti dillawek ket di unay naimas ti makan. Natangken pay ti innapuyda ta kasla bagas pay laeng no ganingatem. Tay sida a no ar-arigem awan ramramanna. Gangani dua pulo ken uppat nga oras kami iti taaw.

Dagitoy man dagiti ladawan nga innalak manipud iti selponko.

Ti Super Ferry 17 a naglugannanmi.


Computer station iti uneg ti barko


Reception Counter


Ti Bar. Mayat ti agkanta no medio nakatanguapkan iti espirito ti arak.


Ti sumingsingising nga init iti tengnga ti taaw.

Ti Business Class Rm 205. Walo ti laonenna a tao.

Playhouse

Ti agpakpakadan a malem

Bye bye Manila!

Ilocano Youtubers

Bayat iti panaglangoyko iti youtube nakitak man dagitoy ket naawis ti imatangko nga i-feature ditoy blogko.

----------------------------


----------------------------


----------------------------

Kaing-ingas

Padpadasekman ti agipigket ti Youtube kadaytoy blogko. Ket nagtakawak iti bidiu ti sabali tapno pamadpadasan no agkorre met laeng. Awan pay ti linaonna gamin tay accountko ket.


-----------------------------------------------

Panaglupos

"Karasaen, maysa a pinarsua nga agsukat ti supot ti kudilna. Agkarkarayam ket tumuklaw iti ania man a kanenna. Rungrungduenna ket sananto alun-onen."

Ngem kasano no ti maysa a tao ket aglupus. No kasapulanna met iti panagbalbaliw manipud iti nakannawidannan nga estilo iti panagbiag. Ket gammatanna ti gundaway a naipasango kenkuana. Ket umallatiw iti narabraber a pagkarayaman. Iti nalawlawa a bakir a napunno iti opotunidad ni pannakigasanggasat. Makuna kadi daytoy a maysa a karasaen?

Maysa a desision ti inaramidko. Kasapulak met ti panagbalbaliw. Manipud iti trabahok a nangted namnama kaniak iti nasurok a lima tawen ket pinanawak tapno serkek ti nalawlawa a ridaw.

Diak koma metten mapanunot ti kastoy no ti langenlangenmi iti dati a bossko ket simmayaat. Agingga a dimteng ti kanito kasla man iti panagriknak ket awan mamaaynan iti ania man a maaramidko a pabor para kadakuada.

Ngem uray pay ti aso no kinugtaram ket ngumernger a kumamat kenka, ti tao pay ngata a naaddaan iti naan-anay a panunot, iti rikna a masaktan uray pay iti sao laeng.

Nasisiyaat laengen ti kastoy nga agingga nga adda pay bassit natda a respeto iti tunggal maysa ket summiasiak laengen iti dalanda. Sapulek met no ania agur-uray kaniak iti ikub ti bakir.