Prose 86- Dinamagmo kaniak ti Ayat

Dinamagmo kaniak no ania ti ayat
Ayat?
Kasano kadi nga iladawan ti ayat?
Umanay kadi ti kimmampuso nga iyuritko a tinta
a nangmantsa iti sin-aw dagiti birhen a papel?
Wenno ti maris ti dara iti tunggal maipasak
Iti umukuok a kusilap dagiti nalabusan ti managbasol a matak…

Dinamagmo kaniak no ania ti ayat
Ayat?
Ania kadi ti ayat?
Ayat kadi ti marikriknak no kasta a pergenka
Ket umingar ti nagbaetan dagiti luppok
Ti panaas ti pus-ong a di maipapas
Ti im-imeten a rugso toy barukong…

Dinamagmo kaniak no ania ti ayat
Ayat?
Ania kadi ti ayat?
Diak ammo no ania ti ayat kunak
Manipud idi linisiam toy riknak
Diakton ammo no ania ti ayat
Ta ti ammok narsaak metten ti namnamak!



Jake Favila Ilac
Signal Village, Taguig City
February 19, 2007


Open Grazr
Post a Comment

Popular Posts