Prose 85 - Nanangko! Nanangko!

Nanangko! Nanangko! Apay a kasta ti langam?
Napananen dagiti isem dita rupam?
Ayannan dagiti kayo a sarrukodmo no kasta a matutudo?
Ti saklulo dagiti ayug ti kabakiran iti ngariet ken basnot ti allawig,
Ken sarapa dagiti marunrunaw a lasagmo dita surong!
Rinamesda ti dayawmo nanangko ket dida nangitedda,
Kinurimesda dagiti nagunegmo tapno iluam dagiti babatom
Iyulam ti gameng nga indulinmo ken kupkupikopam
Isuda amin Nanangko agtartarigagay a mangbatok
Ti lasbangmo ket inlugeslugesda, sinisipda ti dirom!
Nanangko agsangsangitka kadi?
Ta pinadarada dagiti annakmo idiay dan-aw,
Dagiti impaangotda a sabidong a kumarayam,
A mangbekbekkel iti aangsam ken aangsan ti puli
Dagiti agtatapaw nga abalbalaymo a sinsinan!

Nanangko matimodmo pay kadi?
Malagipmo pay kadi dagiti baresbes ken dissuor
A bumtak iti barukong dagiti bato,
Ti pagtatabbugan dagiti ikan ken udang!
Nanangko malagipmo pay kadi idi maragsakanka?
Ket pinuyotam iti sang-awmo ti ullawko
Inyugedmo ti pigsam iti kapagayan!
Ngem apayen Nanang?

Nanangko! Nanangko! Apay a kasta ti langam?
Napananen dagiti isem dita rupam?



©aug 3, 2006
signal village, taguig city



 agsubskribo!

Post a Comment

Popular Posts