GUMIL Filipinas for Party-List?

Idi napalabas a tawen adda idi gakat a nataming bayat iti panagmimiting ti GUMIL Filipinas (Open Forum sa daydi?) a mamagbalin iti GUMIL Filipinas a kas party-list iti kamara, ket ita ta asideg manen ti eleksion kasla nakulding man ti lagipko kadaytoy a banag, aglalo ket adda ti nakitak a headquarters ti AGBIAG TIMPUYOG ILOCANO, INC dita man Edsa. Iti damok a pannakakita kurang laeng tay MANNURAT a balikas tapno ipapanko a TMI dayta a grupo. Diak ammo no ania ti plataforma da ngem siguro kasla met kadagiti dadduma a party-list ket, iti pakaseknan siguro dagiti amin nga Ilocano iti Ilocos (kasano met garud dagitay adda idiay Cagayan, Isabela, Nueva Vizcaya, Quirino, Tarlac, Mindanao ken US?).

Ti GUMIL Filipinas ket agpayso nga adda met balakna a tumapog iti tay-ak ti politika a kas iparparapirip dagiti aspirante a memembro ken ofisiales. Ania ngata met ti plataforma na? Ti pangi-promote na ti literatura iti intero nga ILOCANDIA? Nangnangngeg tayon dagita. Kasapulan a talaga ti ILOCANDIA ti panangpreserba na ti amin a banag a maipapan iti nagtaudanna, ti pagsasaona ken pati metten dagiti kannawidan a di tayon makita ita. Siguro ti aramidenna a linteg ket tay pagbalinna a ti medium of instruction kadagiti eskwelaan ket ILUKO. Mangpanday iti bukodna nga standard.

Ngem ammo tay metten no kasano ti karugit ti politika ditoy Filipinas, ket amangan no mastrek dagiti di met mannurat daytoy a gunglo tapno isayangkat da ti interes da tapno laeng a makatugaw sadiay Kamara (nastrek san ketdi he!he!he! - pakawanendak), syempre ti puntirya da ket ti nagdakkel a pork barrel a pangtulong da kano kadagiti tattao. Agbalin ti GUMIL a kasla stepping stone da sadiay Kamara.

Maysa pay a nakaddidillaw ket 'tay kalkalpas laeng nga Internasional Kombension sadiay Hawaii, mabilbilang man ketdi dagiti pudno a mannurat a nakapan ta kaaduan ket na-deny, kaadduan dagiti nakapasa ket dagitay di met agsursurat. Awan kadi ti measures ti gunglo wenno awan kadi ti boses na tapno back-apanna dagiti membrona? Saan kadi a dayta ti rugin a mastreken ti gunglo dagiti di met talaga nga agsursurat. Sabagay agpareho met laeng ti "M" iti GUMIL (Mannurat ken Mannurot). Kumanunongak diay imposte ni Manong Roy iti blogna, kitaen koma ti gunglo dagiti mayat nga agmembro ket agdalanda koma iti umno a proseso, salwadan da koma ti interes ti gunglo. Aglalo itan ta awan kanon ti makunkuna nga associate ta sigud a regular-en.

Siputan tay laengen dayta a gannuat ti GUMIL. Siguro no saan pay a kadagitoy a tawen iti basingkawel ti panangirugi da kadaytoy a gannuat, amangan inton sumaruno nga eleksyon addanton GUMIL a party list.
4 comments

Popular Posts