Maika-39 a GUMIL Filipinas Kombension

April 13, 2007 - Kalpasan daydi a pannagdaw-asmi idiay Pinili ket nagdiretsokamin sadiay Currimao, Ilocos Norte tapno agatendar iti maika-39 a kombension ti GUMIL Filipinas.

Manipud junction ti Pinili ket naglugan kami iti bus nga agpa-Laoag, kinunkunak kenni Mang Jovy, "Manong dita met siguro mapukaw ditoy ania?" ignorante-ak ta damok a talaga ti agpa-Currimao, ken no ania a talaga ti nasao nga ili, ta kasla ar-arapaapek a maysa daytoy a Boracay ti Norte, jackpot kunkunak iti panunotko ta bassit laeng ti gastos ngem world class a beach ti mapan pakailumluman dagitoy mawaw a dapanko.

Nagdissaag kami sadiay junction (met laeng) ti Gaang, maysa a bario ti Currimao nga adda iti Maharlika Highway. Hmmm! agat babay ti malang-abko. Agtallo kilometro ngata ti tinaray ti tricycle a nangitulnog kadakami iti sango ti Ernesto Go Megacomplex. Nagtalliawtaliaw kami ta awan met makitami a delegado. Ket segun iti panangibaga ni mang Leo, ti kano pagdagasan dagiti sumangpet a delegado ket iti elementaria nga eskwelaan. Gapu ta kuminnit ti pudot ti init, nagdardaras kami a simrek iti inaladan ti eskwelaan. Adda gayam iti masungad ti naituding a kwarter ti Gumil Metro Manila, maysa nga home economics room (sa?) daytoy. Nalawa daytoy a para kadakami a dua kunkunak ta ti ammok dua kam laeng kenni Mang Jovy a naggapu iti Metro Manila. Ta uray man ket no agchachaka iti uneg. Kompleto iti alikamen, adda bukodna a telebision, kubeta ken pagluttuan (makikitak dagiti kalkaldero, parayok, aklo, kutsara, pinggan, tinidor) no kikbaem ti likod ti kwarto. Adu ti delegado a nasangpetanmi iti uneg ti kwarto, aglalaok ta adda Ilocos Norte, Ilocos Sur, ken Pangasinan. Mayat latta ta adda kaddua a pakikontesan iti urok hehehe.

Insimpamin a dua ti gargaretmi ket gapu ta dikam nakapagpelles wenno nakadigos man laeng, nagtarusanmin ti nagdigosen, nadagaang unay ti panawen. Kalpasan ti no mano laeng a buyat (naibusan ti pangbalnawko) nagsukat kamin ket inawiskon ni Mang Jovy a mapan agrehistro ken tapno makapangan met da taon, mumalemen gayam.

Imbakalko garud ti imatangko iti malikudan ti megacomplex a kunkunada, naa! adayo met gayam ti babay yos!, puro met kakawkawayanan ti makitak a nangbalangan iti buya ti baybay, pati ti lapayagko ket pinagganarko bareng matimudko ti garakgak ti sumarabo a dalluyon, ngem awan met no di immak dagiti kalding. Adayo gayam ti beach a pagparpariag ti Currimao.





Dagiti sumaganad a ladawan ket naala iti maysa a resort a napanmi nagpassiaran. Hmmm mayat koma ti agbakasion ditoy uneg a ngem nangina met. Di a kabaelan ti bulsa.






Post a Comment

Popular Posts