Paoay's Marvelous Heritage

Sakbay daydi panagkarkaratotko a panagawid ket pimmasiarkam biit idiay Paoay tapno sirpaten ti maysa a patawid dagidi Ap-apong tayo para kadatayo ita a kaputotan ken iti sumarsaruno pay (bareng agtalinaed pay), ti Paoay Church. Nakalista daytoy a simbaan iti UNESCO a kas "Tawid iti Sangalubongan".

Kuna tay am-ammo tayo nga Arkitekto a ni Augusto Villalon, maysa a commissioner ti UNESCO..." bigbigbigen daytoy ti sangalubongan a kas maysa kadagiti naidumduma nga ehemplo ti Philippine Architecture manipud iti panawen dagiti kastila,"

Kadduami ti panagpassiar iti dayta a simbaan ni Dr. Jim Domingo, ket inbinsabinsana dagiti materiales a naaramat, ti rigat dagidi nagkakauna a tattao tapno laeng mabangon daytoy, ti korales a no ar-arigem ket kasla lakasa ti kadakkelna (uray pay gayam idi ket daddadaelendan ti baybay hehehe)a naiporma a kasla briks, pinagtapkal-tapkalda babaen ti ap-apog. Mano ngata a dara ti nagtedted, ti umsi ken uyaw a nangngegda, ti basnot a nalak-am ti bagida?

Iti asideg daytoy a simbaan ket isu met ti taeng ti maysa a bannuar ni Apo Valentin Diaz, maysa a pundador ti Katipunan ken membro ti La Liga Filipina. Ngem kasla metten nabaybay-an ti karatulan dayta a disso, gapu ngata iti panaglabas ti panawen ket in-inoten a malipatan ti naitedda a kontribusion para iti panaruk-at tayo iti ima dagiti conquestadores.

Ha! napno ti adal gayam ti ili ti Paoay. Agsubliakto ulit, addanto manen baro a masukisok dita a lugar a saan laeng a dagita.





Post a Comment

Popular Posts