MADE IN CHINA

Saanen a gagangay kadatayo dagiti damag maipapan kadagiti produkto a naggapu idiay Tsina. Dagiti makan (ania man a maipauneg iti tiyan) a nalaokan kadagiti di koma rumbeng a kanen ti tao a kas iti pormalin. Segun iti pannakatakuat ti Bureau of Foods & Drugs (BFAD) uppat kadagiti nasao a produkto a naggapu iti Tsina ket adda laokna a kas. Kas ammo tay met daytoy ket ar-aramaten dagiti agbalbalsamo tapno malapdan ti dagus nga irurupsa ti bangkay ti maysa a tao.

Sipud idi linuktan ti Tsina ti ridawda kadagiti gangganaet a kapitalista ket nagbakuit met aminen dagitoy a napan iti nasao a pagilian tapno sadiay ket mangipatakderda kadagiti plantada. Maysa nga addang a nangpapintas iti ekonomiada ngem pannakalugi met dagiti dadduma a pagilian gapu iti panagserra dagiti paktoria a di makabael iti panangibagsak presio ti Tsina kadagiti partuatda a produkto. Nalaka ti produktoda ta ti maysa a rason nalaka met ti pangpasueldoda kadagiti agtrabtrabaho iti planta. Maysa a banag nga no idiligmo kadagiti dadduma a pagilian a kas iti Filipinas ket pamitluenna ti kinalaka ti aw-awaten dagiti empleyado.

Gangani sa amin a produkto ita nga agrarai-ra kadagiti merkado ket partuat sadiay China. Naminpinsan a talaga a sinakupda ti lubong babaen kadagiti produktoda a di mapagtalkan ken di garantisado nga agbayag nga usaren.

Manipud kadagiti bado a maisuot ginabsuon ti idadatengna kadagiti pagtagilakuan mpabangketa man wenno kadagiti mall, dagitoy a naglaka a mabiryat wenno mamitlo laeng nga isuot ken lab-an ken agkupas a dagus wenno agyatyat.

Dagitay sapatos nga ilaklako dagiti Muslim iti bargain-an, kaing-ingas dagiti adda naganna a produkto. Kunam no nakajakpatka ta naglaka a talaga ngem nungka. Agbabawika la ketdi ket tagisayangemto tay kuartam nga ingatangmo ta kalpasan a nausarmo a pang-arabas ket nalkabton piman tay dapanna wenno agkublakublangton ti kulorna.

Payong a tigsisingkwenta nga inton ukradem ket matastas dagiti dait iti paragpagna, dagiti brief wenno panty nga aglukaylukay ti garterna, bateria nga uppat ti lima pisos ngem agrarrarek tay piman a radio wenno agandap-andap tay plaslait, dagiti martilio nga no impukpokmo ket matukkol tay ulona. Natangtangken payen tay lansa ngem tay martilio.

Ken dagitay mangmangan iti koriente nga aplayanses tayo iti balay. Electric Fan a gumilgil-ayab ti motorna, dagiti kuno Compact Fluorescent a bumbilia a no naminsangapulo laeng nga inswitchmo ket dinton gumana, wenno dagitay bumbilya a tumayab dagiti sarmingna ta kasla paltog a bumtak, bumaniit a hair dryer, TV a mapuoran ti picture tube na. Dagiti chandelier nga agloose dagiti parpartesna wenno aglati a dagus. Wenno matnag lattan a di ammo ti gapgapuna.

Electronic Gadget a kas iti selpon a no i-chargemo ket sumged, DVD a diam ammo no ania ti gapuna no apay a di gumanan. Digital Camera a di maisuro ti direksion ti pokusna.

Uray pay tagitay motorsiklo, agporpordios dagitay nakagatang gapu ta agkakanayon iti panagpatarimaanda iti nagatangda a yunit.

Pati dagitay agasda a di maawatan dagiti naisurat, dagitay awan ti etiketana no sinno ti akinpartuat a kompania. Paggaayat ni Filipino ti agisperimento ket padasenna dagitoy, iti kamaudiananna imbes nga adda iyedna panagbalbaliw iti salun-atna ngem ketdi disgrasia ti pagpasaranna.

Ket ita adda manen baro a produkto a natakuatanda a palpak ti pannakaaramidna. Dagitoy tay ay-ayam a pang-ubbing nga ipaspasubli ti Fisherprice manipud kadagiti nagatang. Adda kano “lead” na ti inusarda a pinangpintura kadagitoy. Maysa a kemikal a makapababa iti IQ dagiti ubbing ken no maminsan pay agbalin pay daytoy a puon iti pannakatayda.

Malagipko la ketdi dagitay makmakan a dabiana idi ubingak, dagitay ay-ayam a diretso a naipisok kadagiti bungon ti sitseria. Angot plastik pay ketdi no luktam ket santo mulmulan no adda dagitay maregmeg a naimilkat kadagiti ay-ayam. Adda met tatakna idi dagita a Made in China.

Ken ti naka-am-amak, dagitay pasurot iti Jollibee ken McDonald nga ay-ayam, amin dagita ket partuat ti China. Ditay ammo no natalged met laeng dagita nga ay-ayamen dagiti ubbing.

Gapu kadagitoy nga insidente ket sapay ta agnakemen ni Filipino ket ammona nga ayaten ti bukod a partuat ni padana a Filipino. Pagan-anno tay garud ti nalaka a produkto nga awan met ti kalidadna ken irubona pay ti biag tayo wenno agresulta iti nakarkaro a pasamak a pagbabawyan tayo. Iti sabali a bangir, dagitoy a partuat ti China ket makuna tayo a basura ta dida met agbayag, ditay met mabalin a tarimaanen ta awan ti partes a magatang iti lokal a merkado. Naynayunan tay laeng ti problema ti lubong a kas iti basura.

Post a Comment

Popular Posts