POR (poor) DELICADEZA

Awan siguron ti kasasam-itan a makuna a galad koma ti maysa a politico/tao a mabalinna nga ibinglay, ipatawid wenno ipakita a modelo para iti padana a pinarsua no di ti delicadeza. Daytoy ti pinakarurog ti kararua ti tao tapno maadaan ti panagbain iti bagina a kas tao, iti rupa ti kapapadana ken nangnangruna iti imatang ti Dios.

Insurona tayo dagiti nagannak tayo kadagiti adal nga usaren tayo iti panagdakkel tayo. Ti sangapulo a bilin ti Apo ti kangrunaan kadagitoy. Ania man a malabsing kadagitoy a linteg ket maysa a basol a mortal para Kenkuana. Basol a pagdusaan tayo iti masakbayan, ditoy man daga wenno iti langit.

Iti panagtakaw ket maysa kadagita. Bassit man wenno dakkel. Basta panangala iti banag nga awan permiso ti maysa/kaadduan ket makuna a panagtakaw. Panagtakaw nga agtultuloy agingga a di mapnek wenno tay kunada a kinagamrud, kinabuakaw, kinabuaya. (Imbag pay ti buaya, no mabsog ket maturog.)

Nagbalin siguron a paset ti gobierno tayo ti panagtakaw dagiti politico iti pondo a naggapu kadagiti ling-et, dara ken lua dagiti tao. Pondo a naur-or tapno koma maibinglay iti sapasap ket mapagnumaran para iti panaglupos iti biag ti simple a tao a mangan laeng iti maminsan iti unos ti nga aldaw.

Iti laksid ti kastoy nga estado dagiti marigrigat a kakaasi nga agkarkaramut tapno laeng makalung-aw iti dangadang ti agos ti biag, adu pay laeng dagiti dursok a politico a di man laeng agkintayeg a manggamrud kadagitoy a pondo. Laklakaenda man laeng nga ibulsa ti kuarta a dida met nagrigrigatan. Pagbibingayan ti sumagmamano laeng a tao.

Nasakit nga awaten ngem pudno a talaga nga awanen ti namnama ti Filipinas tapno makaakkal iti nakailubnakanna ita. Manon a politico ti nangikari iti Gloria ngem no koma adda Gloria a talaga para itoy a daga apay nga agingga ita di pay nasapulan. Naunday unayen. Manon a politico ti naglabas? Sumarem! Siguro makulkol laeng ti utekmo. Wen agpapadada laeng. Agpapadada a nagtagilanga nga anghel. Agpapada nga adda kinasam-it iti dilada.

Umad-adu dagitoy a politico a kasla ruot iti bangkag ti maysa a mannalon. Narigat a paksiaten ta saanda laeng a nakaramut iti maymaysa a disso ngem ketdi adda subbual, sagibsibda, kimmarayamen dagitoy iti agduduma a paset ti bangkag. Saan nga umdas a lamunan laeng dagitoy no ketdi paagisan ida wenno araduen tapno pag-uten, alut-oten dagiti ramotda santo puoran.

Adda ngata talinaay iti panunot dagitoy a politico? Makaturogda pay ngata iti tunggal rabii a kamkamaten ida ti konsensiada (no adda pay natda bilang)? No ti kuarta nga ipakanda kadagiti annakda/kapamilia/kabagian ket naggapu iti kinakunniber.

Kasano nga ipalawag kadagiti anakda no isudan ti agdamag.
"Mama/Papa inaramidmo kadi dayta?"
"Agpayso kadi a nagtakawka? Agsasaoka kadi iti pudno wenno pampandagam ti kinapudno tapno di laeng maibutaktak?"

Nasaksakit siguro no ti anakda ti makapaneknek iti pudno. No isuda nga iyud-idoloda ket maysa a mannanakaw. No ti killo nga aramidda ket nagbalinen a nalinteg iti imatangda.

Aminsan a projecto ti gobierno ket adda kasinginna a kinakunniber. Projecto a napunduan iti utang a naggapu iti sabali a pagilian.

No laeng koma maysa nga agas ti konsensia, maiyun-una nga ipreskribahan dagitoy a politico tapno maagasan ti sakitda. Adda generic a naganna a delicadeza. Sakit a kinamannanakaw, kinamanangulbod. Manamnama la ketdi nga umimbagen ti Filipinas a masaksakit sipud pay idi panawen dagiti Kastila a nangipatawid kadagitoy kadatayo ita.

(Apo kaasian na kami kadi, aya!)
Post a Comment

Popular Posts