CEZA (Corruption Economic Zone Authority)

Ti Cagayan Economic Zone Authority ket nadevelop tapno mangiyed iti narang-ay nga ekonomia iti Cagayan ken iti kabangibang a probinsia. Ti dati a Port Irene ket pinabaroda tapno ditoy ti pagpunduan dagiti barko nga aggapu kadagiti kabangibang a pagilian ti Asia a kas iti Taiwan, South Korea, China, Hongkong ken South East Asian Countries. As-asideg gamin nga amang daytoy a pantalan no idilig iti Manila.

Pinartuat daytoy a ganuat ti pamilia Enrile tapno matulungan (kano?) dagiti agindeg iti dayta a probinsia ken makaparnuay iti ad-adu a trabaho a saan laeng iti agrikultura no ketdi iti pay industria a kas iti elektroniks.

Ngem kagiddan met daytoy ti bukodda a ganuat tapno masoloda ti deppaar ti Cagayan. Adayo nga agpayso iti Manila a sentro ti ekonomia ket di a masirip ti Custom no ania ti sumanglad dita a shipment. No ania ti linaon dagita a barko.

Idi damo ti panagraira ti Casino ti maysa kadagiti pinaunada. Pangallukoyda kano iti turismo. Ngem ita kompirmado a pati dagiti nausaren (slightly used) a lugan ken dimmanonen iti dayta a pantalan. Iti kallabes laeng a lawas sangapulo nga Starex ti naibiahe manipud Sta. Ana a mapan iti Antipolo ket agsublida pay tapno bunagen dagiti natda.

Sapay koma ta masirip ti Custom dagitoy a lugan no adda met laeng papelesda a nabayadan iti umno a balor iti panangiyimportda. A saan a hokus pokus a papel a gapu laeng ta maka-administrasion ni Enrile ket laklakaenda lattan iti panangilikbat.

Isu siguro a kasta laengen ti kinadepensa ni Enrile iti gobierno ta uray isu ket adda ilemlemmengna a limed? Tapno dida masirip daytoy.
Post a Comment