Business Glitch




Para sa mga nagbabalak na magkaroon ng sariling negosyo, sana magdalawang isip kayo sa pagkuha ng inyong accountant na hahawak sa mga transaksyon sa Bureau of Internal Revenue (BIR).

Isa ito kasi sa mga problema na kinakaharap ng aming kumpanya ngayon sa aming accountant. Pinagbabayad ang aming kumpanya ng P55,000 para sa tax deficiency sa taong 2005 lamang at di pa kasama ang mga susunod na mga taon.

Paano ba naming nakilala ang nasabing accountant? Isang examiner ng BIR ang nagrekomenda sa kaniya, kahit hindi naming personal na kakilala ito, pinagkatiwalaan naming ang salita ng examiner. At mula noon nailipat sa naturang accountant ang pangangalaga ng aming dokumento. Siya ang nag-aayos ng buwanang obligasyon pati na rin ang pantaunang transaksyon sa departamento ng gobyerno.

Naging malinis ang mga nagdaang taon. Pinagsabihan pa namin ang accountant na kung ano man ang pumapasok na benta sa kumpanya ay kailangang i-declare niya lahat. Ito ay hindi lamang para malinis ang pangalan ng kumpanya at walang kahit ano mang aberya. Tumugon siya na, siya raw ang bahala. Pwede raw paliitan ang i-declare na benta para makamenos sa pagbabayad ng buwis. Ginagawa rin naman daw ng iba na mas malalaki sa amin. Huwag daw kami mag-alala.

Pagkatapos ng tatlong taon, eto na ang aberya na pinangangambahan namin nung una pa lamang. May dumating na liham mula sa BIR na nagsasabing meron daw hindi nabayarang mga buwis ang kumpanya sa taong 2005, 2006 at 2007.

Akala namin ayos ang lahat! Sino ang sasalo sa kapalpakang ginawa ng accountant kundi ang kumpanya. At ngayon ibinabato namin ang sisi sa kanya. Plano naming i-settle kung ano man ang nasabing deficit at tanggalin na siya ng tuluyan.

Pinagsususpetsahan din namin ang accountant na siya rin ang gumawa ng hakbang para igisa kami sa sarili naming mantika. Baka siya ang nagsuplong, at kung sakaling nabayaran na ang naturang pagkukulang, paghahatian nila ng examiner o kung sino man na nandun sa BIR na kakilala niya.

Kaya mag-ingat din kayo. Hindi garantisado na ang isang accountant na may kakilala sa BIR ay matulungan kayo. Baka mas mitsa pa ito ng inyong kapahamakan. Kaylangang alamin ang background nito kung hindi ito kakilala.
Post a Comment

Popular Posts