Filipino Tindera(o)s are lack of Good Sales Relationship



Siguro amin tayo ket nakapadasen iti panangsuplado ti maysa nga arogante a tao nga aglaklako nangnangruna kadagiti babassit a paglakuan a kas ti sarisari store, iti palengke a paglakuan ti karne/gulay/ikan, iti botika, iti paglakuan dagiti badbado ken pati payen iti restoran.

Adu dagitay aglaklako nga uray no nasayaat ti pakilangenmo kadakuada ngem inton asikassuenda ti gatangem wenno kasapulam ket urayda la bumugkaw, kumusilap wenno ibarsakda ti suklim iti latag. Kasla man rugitka iti panagkitada wenno adda maangotda a nabuyok iti bagim ta nakamirduotda.

Adda pay dagitay katulongan iti paglakuan nga uray no imbagamon ti gatangem ket didaka ikankano, un-unaenda ketdi ti makituttot iti padada nga aglaklako. Ken adda met dagitay aglaklako a masadut a tumakder iti nagtugawanna ket kaslana urayen ti gatangem a banag a mapan iti sanguananda. Naing-ingarda pay ngem tay akinkukua iti paglakuan.

Dagitoy a babassit a banag ti di makita dagitoy nga aglaklako. Awanda koma iti paglaklakuanda no awan dagitoy gumatgatang kadakuada ken nasisiyaat laengen nga irikepda ti paglakuanda ket agkul-obda lattan iti ayanda. No seriosoda iti gannuatda a dumakkel iti pagbibiaganda, baliwanda koma ti pannakilangenda kadagiti gumatgatang. Sursuruenda ti umisem uray pay no nakipagbreak ti boypren/gelprenna kenkuana, wenno naporlata tay tinayaanna iti hueteng di kalman, wenno di a napagustuan idi rabii kenni lakayna/baketna. Iti kastoy a pannakilangen, sigurado agsublinto a gumatang ulit ti kustomerda, ket agbalin a suki wenno gayyem ket irekomendananto daytoy a paglakuan kadagiti gagayyemna, kadagiti kabagianna ken pati iti barangay. Siento por siento manamnama iti dakkel a ganansia gapu laeng iti maysa nga "ISEM".

"Saan a makita ti piso iti panagruprupa ti tao no ketdi ti kalangiking iti bulsana a mangiyed iti grasia."


Post a Comment