LINGALING



Lingaling ti awag kadaytoy a mula kadagiti Ilocano ti Cagayan, lotus iti ingles, addaan iti pink a sabong a sangadangan ti kadakkelna ken amarilio ti tengngana. Siit-siitan dagiti kayo(stalks) ti sabong agraman dagiti bulong a kas kadakkel iti bulong ti aba a nakatapaw iti danum no matinep ngem no kinatikag aggiinnuna dagiti bulong iti tayag. No agtinnag dagiti petalio ti sabong mangrugi metten a tumpuar ti kasla ragadera nga abut-abotan a pagdianan dagiti bukel.

Idi babassit kami pay, matandaanak pay dagitoy a mula iti tengnga dagiti taltalon sadiay tengnga ti Galluan sadiay Lasam. Masarakan dagitoy kadagiti sinilong a pagattao ti katayag dagiti tambakna, dagiti kinelleng a saan a maab-abbatan wenno iti buyon. Kas katayag ti tao dagitoy a mula.

Paggiinagawanmi dagiti bunga dagitoy a mula idi, mabalin gamin a ngatingaten dagiti bukelna a kasla mani uray no saan a naluto, nananam daytoy a sumam-it. No mapan kami agliwliw idi, kadagiti kalingalingan kami nga agdiretso, sadiay a makitam dagiti lames, paggaayat gamin dagiti ar-aro, gurami ket carpa a paglingedan/paglinongan dagiti bulongna no tengnga ti aldaw.

Ita awanen dagitoy a mula sadiay Galluan, pinatpat gamin dagiti nagkakauna a lallakay a nangtalon kadagiti sinilong. Pinatpatda a naminpinsan dagiti makasugat ken makagarummiad a lingaling. Kaadduan met dagitoy a lallakay ket natayen, diak ammo no matandaanan pay dagiti dadduma a kasadarko, nga iti naminsan adda kastoy a mula sadiay.
Post a Comment

Popular Posts