Naudi manen ni Ilocano!

Bayat iti panagbuybuyak idi rabii iti self title program ni Jessica Soho napabilibak iti maysa a segmentna maipapan iti pelikula a Kapampangan a madamada ita a mangsapsapulda kadagiti castings da.

Ne! no kayada apay a di kaya dagiti Ilocano kunkunak iti panunotko. Am-amang met nga ad-adu ti Ilocano no idilig kadagiti Kapampangan a mangbuya koma kadagiti partuat a pelikula a maaramat iti bukod a lengguahe.

Kadagiti kallabes nga indie films (independent producer) a naipabuya iti ballasiw taaw, maysa ti dinirehe ken nagbidaan ni Cesar Montano a “Panaghoy sa Suba” ket naaramat ti Bisaya, kadaytoy pay a pelikula ti nangalaanna ti adu a pammigbig-aramid kadagiti award giving bodies.

Sadiay Ilocandia umatiperper ti “ayug-ilocano” wenno dagiti kankanta nga ilocano kadagiti estasion ti radio, ngem ditoy Manila no dika mangipatugtog iti MP3 playermo ket diam mangeg dagiti a ritmo. Ad-adda ketdi a mangegmo dagiti Bisayan Song wenno tay Kampampangan-Rock a mangdomdomina iti air-waves. No kasta dagiti telenobela kadagiti lokal nga estasion ti telebision, buyaen met ngata dagiti Ilocano?

Kaano ngata nga adda makaitured a mangpondo iti kasta a proyekto, adu dagiti nalalaing a mannurat tayo nga ilocano a mabalin a mangtulong tapno mangsurat iti maysa a pampelikula wenno uray dagitay epiko tayo a kas ti “Biag ni Lam-ang” a mabalin a mangpantay iti “Lord of the Rings”.

Biag ni Lam-ang agbalin nga Oscar nominee? Apay ket a saan?
Post a Comment

Popular Posts