No Glory for the Philippines

"HOPELESS PHILIPPINES"

Ito ata ang nababagay na linya para sa kampanya ng Pilipinas sa Olimpyada. Magkakasunod na bumagsak sa kani-kanilang kompitisyon ang mga pambato ng bansa. Ni hindi sila nakaakyat man lang sa susunod na hakbang at bumagsak agad sa eliminasyon ng unang pagtatangka.

Ang mga iba ay nabura nila ang Philippine Record pero malayo iyon kung ikumpara sa mga naitalang World Record. Hindi iyon naging sapat. Kinulang sila ng lakas kahit sabihin ng ipinalangin sila ng sambayanang Pilipino.

Sumabak si Maristella Torres at Henry Dagmil ng Athletics pero hindi sila pinalad. Halos nasa panghuli lang sila sa kanilang mga kalaban. Ganun din si Tshomlee Go sa Taekwondo at Mary Antoinette Rivero na sinawing palad din. Sila na nagreyna at naghari noong SEA Games ay isa-isang nalagas. Malayo masyado ang kanilang lakas kung itapat sa mga taga Europa.

Buti pa ang mga karatig bansa natin dito sa Southeast Asia at may medalyang maiuuwi. Hindi ba tinalo natin ang mga ito noong dito ginanap ang SEA Games. Ang Indonesia na may 1 gold, 1 silver at 3 bronze at nasa pag-35 sa ranking. Ang Thailand na pang-50 sa ranking ay may 1 gold at 1 silver. Ang Malaysia, Singapore at Vietnam na may tig-iisang silver at pang-65 sa ranking. Baka mamaya pati Myanmar, Laos, Brunei, Cambodia at East Timor ay may makuhang medalya pero tayo hanggang tulo-laway na lang at uuwing luhaan.

Kulang talaga ang programa at pondo pagdating sa amateur sports. Kulang ang mga kagamitan para makatuklas at maka-enganyo ng mga atleta na sasabak sa ganitong larangan. At minsan ang mga opisyales ay di nagkakasundo, nag-aawayan sa pondo na pwede nilang makulimbat. Sa dami ng Pilipino wala man lang ni isa rito na pang-gold.

Bakit kung sa professional na division may naghahari na Filipino. Lalo na sa boksing, bowling, golf at billiard. Sana isinabak muna si Pacquiao sa amateur para nakaginto na ang Pilipinas bago ito nagpropesyonal pero gasino lang naman kasi ang kikitahin mo sa amateur kung ikumpara sa professional. Milyon-milyon ang layo. Kulang din ang insentibo sa mga atleta. Tignan na lang natin ang kaso ni Mansueto Velasco, ang panghuling pilak na medalya ng bansa sa Atlanta Olympics. Ni hindi naibigay ng tuluyan ang ipinangakong gantimpala ng mga politiko. Ito sana ang daan para pagsikapin niya ang susunod na olimpyada noong 2000 para makamit ang ginto. Tuloy nadismaya ata ang tao at pinasok na lang ang showbiz.

Ngayon uuwing wala ang mga delegado ng bansa. Tanging karanasan ang baon. Pagkatapos ng apat na taon sasabak na naman sila. Paulit-ulit na kasaysayan. Parehong delegado na natalo ang isasabak ulit.
Post a Comment

Popular Posts