A cent for your thought



Dumarami at nadadagdagan pa ang aking mga naipon na sentabo sa lalagyan ng Downy. Ito'y mga sukli sa Mercury, True Value, SM Supermarket, Landmark, 7-11, Ministop at kung saan-saan pa. Halos mapuno na. Kanina lang nadagdagan na naman.


Gusto ko sanang magprotesta kung susuklian ako ng ganitong pera dahil pabigat lang sila sa bolsa at madalang namang gamitin dahil sa liit nila at hindi na tinatanggap ng ibang tao gaya sa mga traysikel pero wala akong magawa. Tanging simangot na lang ang isusukli ko rin.



I-imagine mo na na magbabayad ka ng pamasahe sa dyip ng P8.50, pero puro tig-10 sentabo o 5 sentabo, baka mabulyawan ka ng drayber dahil isang salop na ang laman ng kanyang palad.

Sa probinsya, lalo na dun sa amin sa Lasam, hindi na tinatanggap ang mga ito pati yung mga 25 sentabo. Katwiran nila wala daw mabibili ang mga ito at napakadaling dumumi o kapitan ng kalawang. Mababang klase kasi ang ginamit na metal sa paggawa.

Dati may programang pangkawanggawa ang dating First Lady Ming Ramos na Piso para sa Ilog Pasig, ito'y naglalayong linisin ang naturang ilog. Bakit kaya piso at hindi sentabo man lang kung saan mas marami ito? At mas madaling magdonate.

Pati na rin yung mga nakikita natin na coin can sa mga boutiques at shops ng mall na nasa harap ng counter, o kaya'y sa MRT na may mga tauhan ng Red Cross na akala mo namamalimos dahil nag-aabang sila ng sukli.

Speaking of namamalimos, kung ganito kaya ang ibibigay na pera sa kanila ano kaya ang magiging reaksyon? Baka ibalik lang sa'yo at sabihing ang kuripot mo naman.

Sa ngayon balak kong ibangko ang mga sentabong naipon ko dahil sayang naman. Sa huling pagbilang ko umabot na ito sa P50 pesos pero pati ako nahihiya rin. Baka simangutan lang ako ng tagabilang ng sensilyo sa bangko dahil mapapagod ito.

Kung sa Central Bank naman ay napakalaking abala, napakalayo para ito sadyain. Bahala na lang kung anong mangyari sa mga naipon kong sentabo.
Post a Comment