Agkabawen ti Panawen?

Eneron ngem kasla man kalam-ek ti bulan ti Disiembre no ar-arigem ti tiempo ita ditoy Metro Manila. Saan a normal kunak, ta iti kabayagkon ditoy, itaak laeng a mapa-sweter kada mapantalon ken agules, no kasta a maturogak. Kumutukot ti lamiis, manipud iti kudil ket sumuknor nga umuneg agingga kadagiti tultulang ken susuop. Lallalo pay kadagiti nangangato a paset ti Filipinas a kas iti Tagaytay.


Iti panangbisitak ti projectmi sadiay, nalipatak ti nangitugot ti sweterko ket idin ta dumanonannakon sadiay, gangani diak kayaten ti rummuar iti serbismi gapu iti lamiis ti umatiberret nga angin, ken ti angep a nangkumot iti aglawlaw. Di a kaya a parmeken ti uray mano a shot ti pampapudot a mainom, wenno ti kape manipud kadagiti coffee shop.

Sabagay il-iliwek met ti kastoy a panawen, ta idi ubingak no kastoy a tumapog iti bulan ti Enero aginga iti Pebrero sadiay Cagayan, tiempo metten ti "ipon". Manipud sadiay sabangan ti Aparri ket sumurongda iti Karayan Cagayan. Kapigsada ti agpaadu no kastoy a kalam-ekna.

Kuna dagiti agiwarwaragawag iti tiempo ti panawen wenno PAG-ASA, umabot pay kano daytoy a lam-ek aginnga iti agtapos ti Pebrero. Ti Cold Front ti ipatpatuldoda nga akingapuanan kadaytoy, ti angin nga aggapu manipud iti akin-amianan a parte ti Asia, a kas iti China ken Siberia.

Kadagiti dadduma a paset ti pagilian a kas iti Mindanao ket malaylayusda, manon a pamilia ti nagbakwit sadiay Cagayan de Oro, ta pagatsibet metten ti danum. No ar-arigen ket kasla bulan ti Hulio agingga iti Oktubre ti panawen sadiay, ti tiempo ti matutudo ditoy Luzon. Ket mano pay a barko a pangRORO ti di a nakadaliasat iti baybay dita Visayas gapu ta na-allon. Isu a 'tay orderko a sibibiag a kulibangbang para iti kasar ket di a nakadanon iti naituding nga aldaw ta di a makaballasiw. Aggapu pay gamin sadiay Marinduque dagitoy.

Sadiay Baguio, ganganin umabot ti klimada iti 0 degree. Dagiti kano babbaket ken lallakay ket dida makaturog gapu iti kalam-ekna. Di lallalon no addadan iti lugar ti niebe wenno no ngata agniebe metten dita Mountain Province. Umuna a gundaway iti pakasaritaan ti tropikal a pagilian no kasta ti mapasamak.

Kadaytoy a mapaspasamak ita, makunak nga agkabawen ti panawen. Nagbaliw a naminpinsan ti klima iti naituding panawen. Kasla agmuryot nga agmenopos a baket. Awan ti pilpilienna, no makapungtot ket makapungtot lattan. Singir siguro metten ti nakaparsuaan daytoy kadatayo ta naabuso daytoy idi kaub-ubinganna.
Post a Comment

Popular Posts