Livestreaming; baro a klase ti media


Livestreaming, maysa daytoy a baro a teknolohia a saan pay unay a popular kadagiti dadduma nga agus-usar iti internet. Saan a kas iti facebook, maysa a social networking iti kinapopularidadna nga uray dagiti adda iti sulsulinek a lugar iti away ket addaan iti account a kastoy basta adda la ket internet provider a masapulanda.

Dua a tawenen daytoy a naipasango kaniak, nupay ammok idi nga adda kastoyen ngem naignoranteak met idi damo. Inusarmi daytoy a kadduak ni Mighty Rasing iti Kombension Nasional ti GUMIL Filipinas a naaramid iti Seminario ti OLAS iti Novaliches, Quezon City. Nabuya iti sangalubongan ti kombension uray no awanda iti nasao a pasken. Nakitada ti actual a mapaspasamak kabayatan ti seminar.

Ania a talaga kadi daytoy a livestreaming? Ti livestreaming ket maysa klase ti teknolohia nga online. Agbroadcastka a kasla iti TV. Ti pagpintasanna dimo kasapulan ti transmitter nga isu met ti ar-araten dagiti TV Station tapno makapagpabuyada.

Ania ti kasapulan tapno makapag-livestreaming? Umuna kasapulan ti napartak a koneksion ti internet tapno agtultuloy ti pannakabuya dagiti audience dagiti iparang a pabuya. Saan koma a kasla tay agar-arudok. Kasapulan met ti camera, tapno makitadaka. Saan a tay adda filmna a camera no ketdi tay webcam. Ti maudi, ti speaker ken mikropono tapno makapagsaoka. No makompleto dagitoy ket mabalinmon a ruggian ti bukodmo nga station. Mangipatakderkan ti "Katarindanuman Livestreaming Station".

Dinno kadi ti pakaalaak iti livestreaming? Ti mairekomendak kadakayo a livestreaming provider ket ti Ustream. Mas kabisadok daytoy ta isu ti immuna a nausarko. Agsubskribir iti baro nga account kadaytoy a site. Adda dagiti instruction sadiay a suroten. Ania pay ti ur-urayem?




Kindle Wireless Reading Device, Free 3G + Wi-Fi, 6" Display, Graphite, 3G Works Globally - Latest Generation
Post a Comment

Popular Posts