Inur-urayka


ita a malem, agurayak a kas iti sigud
ammok iti aniaman a kanito sumangbaykan
ta masirayakon iti amianan ti anniniwanmo,
maangotkon ti sang-aw nga iyed dagiti nalamiis a bibigmo.

ammok kailiwnak met a kas iti dati,
iti tunggal panangipabus-oyko iti bagik
a pangipeksaam iti pigsam, iti iliwmo kaniak
kadagiti nadagaang a rabii, ket saan laeng a
siak ti agdayyeng no di ket agraman dagiti inulilam.

addaytakan! kadduam ti gilap ken tambor ti langit
mariknakon ti agepmo iti mawaw nga espiritok
in-inuten a masebseban ti bara ti bagik
ta iti tunggal aprosmo, aglumen dagiti tanda
no mano nga aldaw a nagurayak.

wen, tagikuaennak ulit ita, nanamenta dagiti aldaw
uray iti apagbiit laeng a tiempo,
baginak agingga iti kaykayatmo
ta ammok pumanawkanto manen.


Nov 24, 2010
Valenzuela City
Post a Comment