An Unplanned Trip: Bangui


Apaglikudmi laeng manipud iti arko ti Pagudpod ken sumrek kamin iti ili ti Bangui, awanen ti tudo a makitami. Nakamagmaga ti aglawlaw. Kasla iti laeng ili ti Pagudpod ti buybuyatanna.

Sakbay nga agpa-Bangui kami koma ket dumagas kam' iti Kabigan Falls, maysa a kilometro manipud iti highway. Kunami no sementado ti kalsada nga agpauneg ngem saan gayam, maibati ti lugan iti ruar santo talaytayen ti kasla aripit. Inkeddengmi laengen ti di nagtuloy.

Nagparadakami iti igid ti kalsada a makitkita dagiti higante a turbina. Magagagarankamin a makipinnitiur kadagitoy naiyiras a 20 a paligpalig iti igid ti aplaya. Uray idi adda kami pay laeng iti Arinaya White Beach Resort ken masiparen dagitoy.

Sinapulmi ti serrekan a mangitunda kadakami iti aplaya. Nasurok pay a maysa kilometro manipud iti highway ti dalliasaten. Manipud kadagiti babbalay iti igid ti rough road a kalsada, gangani tunggal balay adda ti naidisplay a tagilako iti naipabassit a turbina.

Iti ididisaagmi iti luganmi ket diak ninamnama ti kapigsa ti angin a sumabat kadakami. Isu met laeng a ditoy ti napili ti administrasion ni dati a gobernador ken senador itan, Bongbong Marcos a pangipatakderan kadagitoy a turbina. Umatiberret ti angin a mangikayab kadagiti kawes dagiti turista a maidaw-as iti daytoy a paset ti Bangui. Dagiti darat iti aplaya ket urayda la a maitar-ap ket nasakit nga agdisso kadagiti saka ken gurong. Permi met ti panagpuligos dagiti mailaklako a souvenir kadagiti abong-abong iti sagpat ti aplaya.

Makuna a maipagpannakel unay dagitoy a turbina a patpatayyeken ti angin. Isu daytoy ti kaunaan iti Southeast Asia, manipud iti 19 ket mapattapatta nga nayandanto agingga iti 46. Dakkel ti tulong dagitoy a mangpababa iti balor ti koriente nga ar-aramaten ti intero nga Ilocos Norte ta 40porsieto ti aggapu daytoy. Naadadan pay dagiti agindeg kadaytoy a deppaar iti tulong a pagkakaitaan babaen iti panaglakoda kadagiti souvenir. Agduduma ti presio dagitoy, manipud iti P50 angingga iti P120. Malaksid kadakami a gimmatang, gangani amin a nakalugan iti dua a bus nga estudiante a naggapu't Manila ket gimmatangda met.

Kalpasan iti picture taking, agkiraosen ti tianmi. Dikami pay gayam nammigat. Imbag ta iti saan unay nga adayo ket nasalawmi ti Kangkang Windmill Cafe. Ti agmaymaysa a panganan, pagkapian a makitkita dagiti turbina. Makapakatawa ti nagan daytoy ta makapanunotka iti sabali. Apay ngata a pinanagananda iti Kangkang?

Bagimi manen ti espasio ta awan tao. Makakapkapeanak manen ket aglalo addu ti pagpilian kadagiti nakagarapon ken agduduma a kape a naggapu iti agduduma a paset ti Cordillera, adda Kalinga Robusta, Premium Arabica ti Sagada, Excelsa ti Benguet ken Arabica Medium ti Mountain Province. Inap-apanmi pay laeng ti tianmi, damdamanton ti kape ket agalas-dosen ti aldaw.

Makunak a kurang ti Ilocos adventure dagiti turista man ken saan no dida umay bisitaen ti Bangui.







Post a Comment

Popular Posts