An Unplanned Trip: The road to Pagudpod



Kalpasan ti panagrikosmi kadagiti calle ti Vigan ket nagsasanguanmi ti boodle food iti Los Mojitos a masarakan iti Gen. Luna St. Nadagaang ti aglawlaw ta urayko la nauksob ti sweaterko. Damo dagiti kakaduak a makita dagiti pasdek iti Calle Crisologo. Iti pammaliiwko ganganin agbaliw ti langa ti Vigan, adda gamin dagiti dadduma a pasetna a saanen a kas ti disenio ti daan a Vigan. Sayang ta nabuniagan pay met daytoy a World Heritage Site.

Iti dua oras a panaginanami ket intuloymi manen ti nagpa-Norte. Pasado alas dos idi panurnorenmi manen ti Maharlika Highway. Makapnek ti buya, manipud kadagiti tabako a ganganin magatud, kadagiti mais nga agsabsabong ken dagiti bawang ken sibuyas a naglalangto ket isu ti nangiturongak iti imatangko. In-inuten nga agkuyem ti tangatang, idi makadanon kami iti ili ti Sinait ket nangbuyaten. Saan a napigsa ngem makasulek iti mata dagiti binukel nga awiden ti wind shield ti kotse. Saguyepyepennak ngem tinengngelko ti riknak. Inkeddengmi ti gumatang iti pampapudot idi makastrek kami iti siudad ti Laoag.

Iti sikigan ti naggatanganmi a grocery iti arak, adda aglaklako iti empanada. Maysa ti empanada kadagiti ipampannakkel ti Ilokandia. Nupay ammok ti langa ti Vigan Empanada ket nasdaawak ta sabali ti langa ti ilaklakoda iti Laoag. Dinamagko iti aglutluto, ti diperensiana gayam iti Vigan Empanada ket linaokanda gayam ti masa iti asuete a pampamaris tapno umirteng ti kulor daytoy. No ti Vigan Empanada ket suka ti Ilokos ti pagisawsawan, ti Laoag Empanada ket ketsap. Mayat ti panaglaok dagiti ramen iti ngiwatko. Ti nagadgad a papaya ken ti napatubo a balatong ket nagtulid iti malasado nga itlog, sa maigamer iti longganisa a puro lasag a nagiling ken nalaokan iti adu a bawang ti nangpabanglo iti empanada. Sapsapulen ti dilak ti raman ti suka tapno patayenna koma ti agat-manteka iti nasarangsang a naipirito. Ngem uray kasta ket naimas latta.

Idi madanonmi ti ili ti Pagudpod ket sumipngeten, nagdardaras kami a nagsapul iti pagdagusan manipud kadagiti plakard dagiti beach resort a matuparmi.



Post a Comment

Popular Posts