Napukaw a Di Man Laeng Simmangbay


kayatko laeng koma met ti maipateg a kas kenka,
maannadan ken maibukbukan iti panawen,
maaprosan ken maagkan,
iti naannayad, iti naimpapussuan.
kayatko koma met a marikna,
mapadasan ken maamuan,
no kasano ti agpanunot
iti maysa nga ipatpateg a pampanunoten.
ar-arapaapek met ti maayat, ti agayat,
iti adda ay-ayatenna.

kasano ngata ti maruknoyan iti nasasam-it
a sarita?
kasano ngata a baliksen dagiti sao
nga ay-ayatenka?
sadinok nga alaen dagiti nota
a kantaen?
sadinok a pandayen dagiti bibig
nga agdisso iti nalabbaga a bibigmo?

kinamaag kadi ti agarapaap?
iti kas kenka,
a laglagaen iti panunot, iti puso indamdamili,
nga iti maminsan iti masakbayan
nga iti maminsan iti masanguanan,
adda ayat nga umapay,
adda ayaten a sumangbay.

limmabasen san ti panawen,
maysa nga aldaw manen ti naikupin
haansan a sumangbay. siguro,
awanen daydiay!



Val City | February 13, 2011
Ladawan: http://www.usernetsite.com/photography/exotic-concept-art.php
Post a Comment