Sika ken Siak, Ayat!



nakatugawka iti nattuang a kayo, agmaymaysa.
     agmaymaysaak iti daytoy disso
nakaturong dagiti matam iti kasipngetan
     sapsapulek ti talinaay iti sidong ti rabii
kasla adda ur-urayem?
     ur-urayek ti agsapa bareng sumangbay
nagdumogka, agsangsangitka kadi?
     kumulding latta't lagip, uray iwaksik.
asitganka koma ngem ingawidnak ti riknak
     agsadagak ti pakinakemko
amangan ta ibagam a dursokak.
     ket tenglek ti ibabasak ni tarumpingay.
limmabasak iti sanguanam tapno agpatigmaanak
     siasinoka kadi gangannaet a nangtakaw iti darikmat
agsardengak koma iti batogmo ngem inyangadmo ti rupam
     inisemannak ket nalapunos ti riknak
inyawatko ti dakulapko
     iyawatko ti talekko
ania ti naganmo?
    Ayat! sika?
Ayat!

     

Val City | Feb 12, 2011
Post a Comment

Popular Posts