An Unplanned Trip: Burgos




Iti pannanganmi iti Kangkang Windmill Cafe ket naammuanmi iti maysa kadagiti staffda nga adda ilaklakoda a daga iti asideg dagiti turbina. Agbalor kano iti P350 per square meter. Nalaka nga amang ngem kasla mapagduduaan. Naammuanmi pay a gangani aminen kadagitoy ket nailakon.

Kalpasan iti panaginana ken panagpalpa ket nagbiahe kami manen, ti ili ti Burgos ti sumaruno nga stop-overmi. Saanmi a sinublian ti simrekanmi itay, no ketdi tinaluntonmi ti desdes ket nalabsanmi ti substation a pakaukkonan dagiti koriente nga agtaud kadagiti turbina sakbay a dumanon kadagiti balballay ti Ilocos Norte. Nangato ti rough-road a sinang-at ti kotse a luganmi. Manipud iti agsikkusikko a kalsada matannawagan ti pakabuklan ti naggapuanmi. Makapnek ti nalawa a baybay a mangdildilpat iti aplaya. Kaslakam simmang-at iti kangatuan nga agpang. Maysa daytoy a buya a kasla kadagiti makitkita kadagiti pelikula iti pagilian a Grecia. Dagiti bato a napno iti puraw a balbalay ket dildillamutan ti baybay ti Agean.

Sakbay a makadanon kami iti batog ti Cape Bojeador Lighthouse ket nalabsanmi ti grupo ti kadilian. Manipud iti dayta a disso matannawaganen ti parola. Ket gapu ta makaay-ayo ti buya, nagsardeng kami biit.

Damok a mauli ti parola ket  ti kunak saan a makadanon ti lugan iti pantokna. Gayam mabalin pay nga agsinnabat ti lugan iti kasla nakutikot ken sementado a kalsada. Iti iyuulimi ket in-inut a matannawagan ti pakabukalan ti ili ti Burgos iti 360 degrees. Ti kalsada gamin ket lumikawlikaw iti bantay a nakaipasdekanna. No iti ili ti Bangui ket kasla ti riknak ket addaak iti pagilian a Grecia, iti Burgos ket kaslaak napukaw iti pagilian ti Ireland. Puro a kabatuan ti nalawa a mawanawanan. Makapasalibukag ti rikna, saan a napudot ti kuddot ti init iti kastoy a bulan ti Enero.

Inistimanakami ti maysa a nataengan tapno makapagsimpa ti luganmi. Agarup a tallo pulo a sementado nga agpang ti sang-aten sakbay a madanon ti wangawangan ti parola. Nakasarado ti gate ket kinuna ti nangistima kadakami a rimmuar kano ti agbambantay. Dina maibaga no ania nga oras a sumangpet. Anian a malmalasmi kunkunak. Kayatko koma nga alaan iti ladawan ti segden ti parola a nakasango iti tawa a makitkita ti umasul a babay. Immanay laengen a nagpapicture kami iti arruangan ti pasdek. Kunkunak iti nakemko; "Sublianankanto!"











Post a Comment