la muerte fino



i.
mandaren ti panunot ti guyod ti lasag,
agalikuno a ngumato-bumaba,
salputenna ti angin
a nakaipatakderan ti batonlagip.
mapespes ti pigsa
ket agpadegges iti natikagan nga ima,
agpasikkil ti naluganan a bagi
tapno itapawna ti gartem.
agbullagaw ti mata,
ken agindayon ti nota,
umpes ti nakatillayon a bola
a nakaiyuperan dagiti nagalis a kararua.

ii.
orasion! arasaas!
arasaas! orasion!

iii.
manipud iti punganay,
iti mangliwengliweng a sipnget,
pasetnak ti dara ken lasag.

iv.
sinukon ti kumanarab-as nga alimpatok
ti mabekbekkel a gasat,
ket sul-oyen ti tubo manipud
iti murdong ti usok,
tumrem ti Timbuktu,
ket agayos ti layus.
addan ti armagedon!
gingined,
bara ken lamiis.

v.
manipud sipnget dumagas
iti puseg ti kasipngetan a siled,
ngem saan a matungpal ti katulagan
ta dagiti kararua maibilag iti lawag.


Val City | Marso 10, 2011

Post a Comment