Anikki ti Maleta

http://ontheroad.buy.co.uk

kinupinmo dagiti badom
sinaggaysam a tinarimaan
nga insiled iti nakaungap a maleta.
pinekpekmo daytoy agingga a nagbungkurog.
awan ti inbatim.
uray ti riknam inramanmo nga inballaet nga inseksek.
urayla agriri ti siper iti panangguyodmo
a panangitangep iti ngiwat ti maletam.
nagsennaayka!
kinitam dagiti dua nga anakmo
a nangrakus iti hamba ti ridaw.
inappungolmo ida a dua.
tinenggelmo ti riknam a naisiled iti maleta.
binilangmo dagiti ramay ti orasan iti diding.
makilinlinnumba!
kayatmo koma pay nga igawid ngem addaytan.
binitbitmon ti garetmo,
iti maminsan pay a gundaway
timmaliawka!
iti panagriknam dumagsen a dumagsen ti kargam
kasla maltat, wenno bumtak
ngem inkarigatam nga inassiwan.
nangpayapayka iti malugam,
binanitogmo ti maleta ket pinasingawam.
asidegkan iti eropuerto!


may 15, 2011
Post a Comment