Ania ti Daniw?



Nabayagen nga agputputarak iti daniw, saan a para iti siasino man ngem ketdi para iti bagik. Uray no dagitoy ket saan a makuna a pulido ti pannakasangalna wenno tay para pampablaak. Agputarak iti daniw tapno mapagustuak ti riknak, tapno mairuarko no ania ti im-impenek a karirikna iti maysa a banag, iti maysa a tema ken iti aglawlaw a paggargarawak.

Addaak pay laeng idi iti elementaria ngem makunak a pagtamtamedak ti obra dagiti agkakalatak a mannaniw iti intero a lubong. Aglalo idi dagiti adda rima iti udina. Kasla man iyindayonnaka no baliksem dagitoy aglalo no tay nakaiddakan. Dagitoy siguro ti nanggutigot kaniak tapno makapagkur-itak.

Adda met dagiti gundaway a no makakitaak iti nangayed a ladawan ket kasla dumges dagiti linabag iti panunotko. Ania ngata no kastoy daytoy? Ania ngata no nagbalin a kasdiay?

No damagenda kaniak no ania ti daniw, diak ammo no ania ti ibagak. Hmm, ania kadi ti daniw? Para kaniak laeng daytoy. Makaammo kayo no ania ti daniw para kadakayo.

Ti daniw ket addaan iti biag, agang-anges, immortal. Saan a makedngan. Agduduma ti marisna. Addaan rikna, no dadduma agkatkatawa, no dadduma agladladingit. Addaan mata a makasirmata iti ngayed ti maysa a banag. Addaan ngiwat a mangiladawan. Addaan panunot nga aggunay ken mangpagunay. Addaan iti kabukbukodan a lubong ket datayo parte ti daniw.

Post a Comment

Popular Posts