Iti Ikub ti Sipnget


manirtiritir a pannakaitapaw
iti natalna, nalidem ken makatitileng
a pannakaisina ti bagi ken kararua
addaan simbeng ngem nabalkutan ti naisangsangayan
ken nairut a pannaginana.
koma no kukuam ti gundaway
ta guyodem ti pannakaipasngay agingga iti ipupusay
tapno iti kasta mabaktawam ti liday,
iti ikub ti kinaagmaymaysa
addaka iti agpang ti pannakaibitin,
ti makedngan no agtuloy ti puli
dagiti sarampiting, ti pannakaiwawa
ti pangaddua ken kinamanaginkukuna,
saan a sika ti mangeddeng,
no di ti tiempo ken panawen,
no maysakanto nga eppes
wenno maysa a kulibangbang.



June 2, 2011

http://australianmuseum.net.au/image/Common-Crow-Butterfly-chrysalis
Post a Comment