Pannakarugnay




nasaysayaat a suruan ti ubing
no kasano ti mangbangon iti maysa a palasio
a naipaaruyot manipud iti darat a nakubkob.
napno pay laeng ti rupana ti regget,
iti gagem a mangbalabala
iti tinukad a pinatibker ti apgad
a naggapu iti ling-et ken saet.
awan ti pannakautoy,
iti pannagbiragsot no iti tiempo
a dumuprak ti agkakamakam a dalluyon.
sadaenna daytoy a tabbaawan
wenno bay-anna ti bagina nga isu ti
aglak-am iti apges ti masaplitan,
ti matuptupraan ti labutab
tapno laeng ikanawana ti
naipatakder a balay
iti inna pannakarugnay.



August 18, 2011

Post a Comment