Skip to main content

Posts

Showing posts from 2012

Sarsarita - 122712

Kinaulimek laeng ti mamaglumen iti bagi a nagarummiadan.


- Dec 27, 2012

(diak kukua ti ladawan)

Sarsarita - 122412

habang ang iba ay punom-puno ang hapag sa mga handa, 
huwag sanang kalimutan ang mga tao na matutulog na walang laman ang sikmura.


-Dec 24, 2012

La Compañía

Naimatangak ti pannakaipasngayna
manipud iti iniin dagiti bulbulong
wenno kadagiti nagangtan a pagsaingan
a mangpaksiat iti agsaknap a tingra
ti naglusdoy a pigsak,
in-inut met a naaddaan ti bukod a regta
kinadkaduak iti tunggal panagpangatona
tapno ipasindayagna ti bukodna a pintas
ket wanawananna ti pinanawak a pagarian
iti apagbiit laeng panawen.
ket iti apagkirem, kaatagna dagiti riniwriw a kiray
dagiti naikuruay nga isem
a mangpasingked pay iti kinapusaksakna
tapno dayawen dagiti napuyatan nga essem.
ita ta kasapulanna ti inana
addaak latta iti sibayna
a pangipulanganna iti binulodna a pigsa
tapno kaduaenak met iti innak panagmaymaysa.



- Dec 20, 2012

(Ladawan: Incendio de la Compañía)

Sarsarita - 121712

Mamatika man wenno saan, apoy laeng ti makapagparnuay iti landok a kalalagdaan.


- Dec 17, 2012


(diak kukua ti ladawan)

Sarsarita - 121612

makabartek ti agtakder iti pantok, 
dakdakkel ti posibilidad a mairangkiska no dimo kitan ti baba.


- Dec 16, 2012

(diak kukua ti ladawan)

Sarsarita - 121512

al-alisto ti mangpilko ngem ti manglinteg iti maysa a landok nga aglatlati.



 - Dec 15, 2012


(diak kukua ti ladawan)

Sarsarita - 121212

Kasla tay nagango a bulong a natnag iti daga
a mapayatan dagiti lumabas ti riknak kenka,


- Dec 12, 2012


(diak kukua ti ladawan)

Music Room

kadaytoy kuadrado a nakubong a siled a pinaidaman ti lawag, aggi-innagaw ti pangaddua a kas iti dangadang ti lam-ek ken kalgaw a di agtugmok, ta agbinnallaet nga  agdumog ken tumangad ti tawa ti artipisial nga angin ti aircon. manipud iti lawag ti telebision, katibnok latta dagiti nawawasnay a saka ti kumud-ay iti dalan,  dagiti dua a bumaro a kabalio aginnunada a makadanon iti ungto.
ket daytoy ti mulmulagatan  a pagsinsinnukatan ti dua nga anniniwan ti mikropono a saggaysada nga ig-iggaman kumkumpaniaranda ti ritmo,  ti dayyeng, dagiti nota a ngumato  ket no dadduma nakangatngato  a dida magaw-at ken a maalimon ti natikagan a karabukobda pagkaykaysaenda dagiti timek ti anangsab, ti sagabasab, ti anal-al a mangkamat iti tunggal maysa kabayatan nga am-ammalanda ti bote  ti aglingling-et a serbesa.
uray la agpayegpeg ti tugaw a naabongan ti birhen a tela ket iti tunggal itatakder ti maysa maikayab a sumurot iti bagida makunes, makumel, mabinnat ket agranitrit. pagdanggayanda ti nota b…

Sarsarita - 120612

ti katukad ti beggang ket maysa a buyat ti nalamiis a danum. - Dec 6, 2012

Sarsarita - 120412

adda dagiti kanito nga ar-arapaaem koma a makita ti maysa a tao ket madamdama addanton itu sanguanam. kasta kadi ti utek addaan iti mata a makitana ti masakbayan wenno nairanrana laeng a napasamak dagiti banag nga ipukpukaw ti puso? - Dec 4, 2012 *diak kukua ti ladawan

Sarsarita - 120212

adda dagiti banag nga uray no agkasukatda didanto latta mabalin ti agkaysa.

 ----

may mga bagay na kahit makapareho na sa porma pero hindi pa rin sila pwedeng maging iisa. (Filipino)



- December 2, 2012


*diak kukua ti ladawan

Sarsarita - 120112

kas iti timmangken a daga, kasapulanna ti padanum tapno rumuka. - Dec. 1, 2012 *diak kukua ti ladawan

Sarsarita - 112812

kasanom a basaen ti tuloy ti maysa a sarita no ti katuloyna iti bangir a panid ket napisang? agpugtoka kadi wenno balabalaem ti paggibusanna. -Nov 28, 2012

Ti Naidumduma a Bullalayaw ti Cagayan

Libro dagiti dandaniw a para ubbing, mayalnag


Mayalnag ti Bullalayaw, antolohia dagiti daniw a para ubbing ti Grupo Bullalayaw inton Dis. 8, 2012, 7:30-10 a.m. iti Ballesteros West Central School, Centro West, Ballesteros, Cagayan iti panangsangaili da Mario A. Rosario ken Dr. Silvino B. Siddayao, prinsipal ken district supervisor, kas panagsaganadda.

Nainaw ti nasao a proyekto iti panggep dagiti mannurat a Cagayano a makitinnulong iti panagrangpaya ti K to 12 Curriculum kangrunaanna iti MTB-MLE a programa ti Department of Education (DepEd), malaksid iti agtultuloy a pannakaparangpaya ti Literatura Ilokana ken ti pannakapatibker ti pannakausar ti nariingan a pagsasao kadagiti umun-una a grado iti pagadalan elementaria.

Buklen ti Grupo Bullalayaw dagiti kangrunaan a mannaniw iti Cagayan ken iti kabangibangna a Kalinga, a kaaduan kadagitoy ti kameng ti GUMIL Cagayan.

Nagpaay nga editor da Johmar R. Alvarez, Roy V. Aragon, Dexter M. Fabito, Freddie Pa. Masuli ken Ariel S. Tabag. Immaldi…

No Laeng Maramananka

ginatangka a diak ammo
no ania ti ramanmo.
basta maay-ayoak iti langam
kadagiti maris nga addaanka
ken ti angot nga iyedmo iti agongko.
naimaska ket ngata
ta tinakawmo ti imatangko,
manipud iti agalibungabong a baram
wen, bara ket ngata?
(bara kuna iti panunotko)
ngem lamiis kuna dagitoy dakulapko.

agam-ammangawak ket ngata?

ta di agtugmok ti panunotko ken dakulapko.
kas ita, buybuyaek laeng ti langam
ammok maysaka a maiparit a raman
a kayatko koma a simsiman
nga ay-ayamen kadagitoy tammudok
ket bay-ak a marunaw ditoy dilak
sakbay nga alun-onek tapno
pagustuak daytoy lasag.
ngem saan a mabalin ta addaanak
iti sagubanit ditoy karabukob.


- Nov 20, 2012

Panangkarit iti Lawag

simmirip iti regkang ti natidtid a bulo.
inlubbotna ti bagina abut
a tedtedda dagiti bukbok
agpalpallayog ti nagangtan a kingki
a naibitin iti tengnga ti kadaklan.
ti anaraarnat' mangtubngar iti sipnget.
naturay ti rangrangna a mangigup
     iti kas kenkuana, awanan gaway
     a mangparmek iti ididiaya ti lawag
     a mangdadang kenkuana iti agpatnag.
     iti kas kenkuana nga agsapsapul iti dengep,
     maysa a kinamaag ti sumupiat iti awis dagiti mata
     ta dina maitured ti agkukot iti sidong
     ti lamiis a kadua dagiti narisangan.

linikmutna ti lawag. inin-inutna ti naglung-ay.
dinanggayanna ti sala ti angin para iti dayaw
ti agrangrang a pagsaingan.
naggaraw ti bagina a kas maysa a tumatayab ti rabii.
ti kas kenkuana nga inyula ti sipnget,
tinaraken ti sipnget
ken immarakup iti kasipngetan.

ita ti gundawayna a makaakal iti pannakaimayeng.
kimmay-ab naminsan, apagdippit
apagdekket ti bagi a kas kabaaw ti lenned.
pinasangbayna ti apagbiit a pigsa
kinaritna ti pudot a yegna …

Panagpasungad

nakadalupisaakak iti igid ti agdan agal-alingag ti lapayag, paspasungadak ti kanakliing ti kandado ken pannakaiduron ti ridaw a landok tapno maikuadro ti langam a siisem ket ayabannak a sabtenka manipud iti sementado nga agdanan. ngem nalawag pay laeng ti aglawlaw makapurar ti anaraar nga aggapu manipud iti de-sarming a tawa a naabungotan iti aragaag a kortina. kasla saan pay nga oras iti panaginana ta mabilangko pay laeng no mamin-ano nga agdisso dagiti ngilaw iti panganak a di man laeng nagaraw kaabay daytoy ti nabaaw a danum a subsublianak no aganal-alak. ti allokna laeng ti kasarsaritak  iti tunggal maideppel ti subsobko. no koma makitak met no ania ti adda iti labes dayta a kortina no kasano ballasiwen ti init ti tapaw daytoy atep iti inaldaw-aldaw, ta di man laeng mauma nga agsublisubli a mangpasiar ti aglawlaw kasla siguro met kaniak a di mauma nga aguray, manipud iti isasangpetmo agingga a dumtengka ti ipusko, sisasagana nga aggarawgaraw a mangsubad iti isemmo iti tunggal ipa…

Baina ken Buneng

Ganganin nalikaw amin ni Nana Merced ti amin a suli ti balay. Di met laengen sumangpet ni Tata Carias.      Agmaysa orasen a binay-anna a nakatakkub ti pinggan iti lamisaan. Itay pay a nagsebo ti digo ti lauya a baka a nagrigrigatanna nga iniwa iti kutsilio ta awan ti natadem a buneng ti lakayna. Ti laeng lalat a baina ti nakitana a nakabitin iti ngatuen ti kasuoran.

Alikumkumenna koma ti pinggan idi maiwalin ti abbong ti ridaw a kumamang iti sala manipud iti kosina. Ni Tata Carias ti naikuadro. Awanan timek a simrek. Narusanger ti suot daytoy ta tanda ti dina panagsukat iti dua aldaw. Simmango iti lamisaan ket imparabawna ti buneng. Nakigtot ni Nana Merced idi maitupak daytoy iti rabaw ti lamisaan. Uray la naglagto ti tinidor ken kutsara. Namarkaan ti nasilap a buneng iti nagkiggang a dara.

"Mabisinkan? Innak laeng idadang diay sida." Timmalikod ti baket.

Agsubli koma ti baket a mapan mangala iti malukong idi magaw-at ti punguapunguanna. Agpukkaw koma nga agpaarayat ni Nan…

Sarsarita - 102212

dagiti tao dumtengda iti biag a kasla angin, no dadduma adda dagitay nabanglo nga uray no nakapanawdan agbati ti angotda iti lagiptayo ngem adda met daytay dakes nga angin a kasla uttot nabangsit la ngaruden ngem apagbiit laeng.

- 10/22/12

Impes a Pilid

Kas itay naglaba ni Nana Merced a pinagsisinana dagiti bado, kasta met laeng ti inaramidna ita ta kupkupinenna dagitoy. Uray napaglasinna dagiti marisda ket pinagsisinana manen dagitoy segun iti pannakausarna, ti para uneg wenno parabalay ken para ruar wenno parapasiar. 
Bagkatenna koman ti umuna a pempen dagiti bado a nakupin idi mabanugbog ti tarangkaan a landok. Natinnag ni Nana Merced ti bado a binagkatna ket nairang-it daytoy kadagiti napempen. Uray la limmabba ti ulona ket pimartak ti bitek ti barukongna. Immapay ti isipna ni Tata Carias ngem apagdarikmat laeng ta no koma ti lakay daytoy ket saanen nga agtoktok pay. Addaan daytoy iti bukod a kopia ti susi.
Nagdardaras ti baket a napan nanglukat ti ridaw. Masisirap ti mata ti baket a natiruan iti raniag ti init iti likudan ti tao. Dina masinunuo no nagkitadan wenno agam-ammoda. Ti ammo ni Nana Merced saan a taga ditoy ti lalaki.
"Apay kadi, Apo?"
"Nana, pasensia laengen iti panangsingak kadakayo. Emergency laeng k…

Ti Imres a Pantalon

Iti panangisalapay ni Nana Merced kadagiti bado a nalabaan nadlawna ti maysa a pantalonna a kasla imres. Daytoy daydi impasarabo ni Eleonor kenkuana. Naminduana pay laeng nga inusar ta nalawa kunkunana. Pinaputedna pay ta medio atiddog ket sumaringgayad ti murdong na no kasta a magna. Inbilinna iti sastre idi sakbay a daitenna nga iyanayna iti apag-usto laeng. Total saan metten a tumayag pay. Ti laeng amakna ket amangan ta lumukmeg, dinton umanay pay.

Ginaw-atna iti salapayan ti pantalon a naka-hanger, kinarawana ti bulsa daytoy ket apag-isu met a medio namagaanen. Naingpis ti tela a nausar. Simrek iti balay a bitbitna ti pantalon. Awan pay ni Tata Carias. Immaplaw ti angin  a simrek kadagiti tawa manipud iti amianan.

Nagbassit ti nagsubanganda ngem nagdakkel ti pinarnuayna a riribok kadakuada. Iti laksid ti kumbeten a kudilda a dua ken dagiti nagpaspasaranda a rigat iti biag ket nalakada la koma a pagsaritaan daytoy. Saan ketdi nga inuubing ti pagarienda nga ugali.

Inikkat ni Nana M…

Sarsarita - 102012

Ang ambisyon ay kahalintulad din nang mga drafts sa blog, gusto mo man tapusin nang minsanan para maipost at mabasa ng lahat pero hindi pala pwede. Kailangan mo rin pala isa-isahin at bigyan nang sapat na panahon ang bawat isa . Planuhin ang bawat salitang isulat, ang takbo ng kwento kung paano tapusin ang nasimulang gawain. 

10/20/12
- JFI

Sangabatia a Danum

Kalpasan a nakapammigat ni Nana Merced. Napanna binagkat ti pagiikanna iti mureng. Inlasinna dagiti de-color manipud kadagiti puraw. Inkuladana daytoy sakbay a gelgelanna tapno nalaklakanto ti pannakaikkat dagiti kimpet a rugit.
Saan a simmangpet ni Tata Carias idi kalman ket nagmaymaysa ti baket a naturog iti balayda. Iti ipapanna pananggatang iti sabon itay, adda nakaibaga kenkuana a nakitada ti lakayna idi rabii a nakiininum kano kadagiti kabaddungalan sadiay outpost ti purokda. Inamad ti kaarrubada no adda kadi ti problema ti lakay. Imbagana lattan nga awan. Nasanay gamin dagitoy a dida makitkita ti lakay a makiininom no awan la ketdi ti padaya wenno selebrasion.
Nagipapasan ni Nana Merced a ginelgel dagiti puraw a bado. Idi nalpas, pinekkelna sana imbato iti agur-uray a sangabatia a danum a pangbalnawanna. Gapu iti pungtotna, napigsaanna iti panagibatona ket nagangayan simmabuag kenkuana ti danum a nakabasaan ti suotna. Ti nalinak itay a napno iti danum a batia ket nagal-alikuno…

Sarsarita - 101012

ta uray dagiti bato dida ibaga a nadagdagsen ti tunggal maysa kadakuada. 


 - October 10, 2012


*diak kukua ti ladawan

Ti Tasa

alay-ayennakto ngata a kasla tasa ket sappuyotennak iti pagiggamak? tanangem kadi dagiti sakam nga umuli iti agdanan tapno ti anabaab iti kaunggak ket makubong a di matnag iti suelo? ibbatannakto ngata ket buyaem ti pannakabuongko no masinit ti ramaymo iti panawen ti panagsalam iti balse? ayatennakto pay ngata a kas idi damo ket urayem ti ibabaawko? idupudopmonto pay ngata iti bibigmo ket umisemka no riniingkon ti panagtuglep kadagiti ur-uratmo?

- Valenzuela City | Oct 2, 2012
(diak kukua ti ladawan)

Panangipasirip

Gapu ta Oktubren, ipasiripko man daytoy madamak nga i-edit a saritak nga agingga ita ket diak malmalpas iti panangyallatiwko manipud iti Filipino versiona. Bareng mawayaak ket malpasko met laeng.



Manipud iti bulsa ti kusapo a denim a pantalonna nangarikap iti baria ken pinapel a kuarta. Nagbilang ken nagkwenta. Dua gasut ket limapulo-pito a pisos. Daytoy ti nabati iti makadomingo nga allowance nga inted ti inana idi Lunes. Ket sakbay a mapakudkod iti ulo no kasanona a pagkasiaen ti nabati a kuartana lalo ita ket makigasanggasat, inyawatna iti baket a kahera ti maysa a Manuel Roxas a pinapel ken tallo nga Emilio Aguinaldo a baria a kas bayad iti panagserrekna iti sinean. Kagiddan ti tiket nga inawat ni Rene ti isem a pagigis nga insukli ti babai a kahera.Adda iti maikadua a kadsaaran ti sinean. Immuli ni Rene iti perdi nga escalator. Ganganina lagtuen dagiti palapad ti di gumana nga agdanan. Simmabat kenkuana ti pasilio a pagtutugawan dagiti lallaki. Adu ti kas kenkuana nga agtutubo a n…

Narciso

Nagdiram-os tapno maugasan ti lanit iti rupana. Ngem idi iyangadna ti rupana. Nakasango kenkuana ti maysa parsua. Sinirigna daytoy ket timmulad ti datdatlag a tao. Nagsinsinnirigda. Inpauya-oy ti tunggal maysa ti buok sada intinnag iti mugingda. Kimmiday ti maysa ket sinungbatan met ti maysa. Kinaemda ti namagaanen a de-rosas a bibig. Ket inagkanda ti tunggal maysa.

- Sept 3, 2012
(diak kukua ti ladawan)

Dead End

ICU. Alas 4:00 ti parbangon.

Tinaluntonko ti nakipet a dana nga agturong iti nalawlawa a kalsada. Inkambiok ti makina.
Kas iti ingangato ti speedometer, isu met itatayok ti nagluganak.
Maangsanak!
Guyoden ti naapres nga angin ti angesko, insikkadko ti sakak. Idi agkurba ti dana ket inyirigko nga inyunnat ti bagik tapno sumurot iti garaw a mamaglag-an ti aangsak. Asidegen ti highway.  Masirayak dagiti agkakalawag a maris ti silaw nga aggapu iti ngato sada agpukaw inton makababadan.
Pinardasak!
Maminsan pay nga itatayok. Ken maminsan pay iyuulog. Ti aglawlaw, maysa a disierto a mangsulsulek iti matak. Insikkok iti ungto. Adda bassit a lawag a masirayak. Maysa itan a nalinteg a dana ti taltaluntonek. Atiddog a nawatiwat. Ngem mariknak lumag-an a lumag-an ti bagik. Agungoren ti makina ket umas-asigen ti lawag. Pinerrengko ti silaw a mangig-igup iti matak. Naatiwak ket inkidemko.
Maysa a deraas!
Nagwingiwing ti doktor. Kinitana ti relo iti punguapunguanna. Inkur-itna ti oras iti papel.…

Lowbat

isilsiledko dagiti gargaret manipud iti maleta iti nakalukat nga aparador. inlasinko dagiti nausar manipud kadagiti nadalus tapno labaak. naguni ti selpon manipud iti igid ti lamiseta. pinindutko tapno sungbatak. nagtimek ti tao iti bangir ti linia. "Agsinatan!" naiddep ti selpon.

blanko!

sinimpak dagiti gargaret nga insiled iti nakaungap a maleta. kinupinko dagiti naka-hanger a kalablaba a bado. naguni ti selpon iti igid ti lamiseta. pindutek koma tapno sungbatak idi nagtanuttot a nakagiddanan ti pannakaiddep ti screen.

blanko!



Aug 22, 2012
Valenzuela City

Alimpatok

manipud iti pakauna

...ti pammatimi, nupay maysa a nakaitalimudokan ti matratar kas tema wenno topiko ket sexualidad maipanggep iti rikna, essem, rugso, wenno gartem, ket saan a maliklikan a dakamaten wenno iladawan ti sexual act a mismo, saan ketdi a bin-ig a kinauttog, kinaderrep, kinaraas ti nasken a maidaniw wenno madaniwan.... ...daytoy eroticismo ket ad-adu nga iparangarangna ti rikna, karirikna, panagrinnikna iti subtle a wagas wenno artistiko/dramatiko a panangiparikna— ta daniw la ket ngarud dagitoy, ket ti daniw, patienmi, ket napnuan rikna— no agdaniwka, mangipariknaka, mangriknaka, makipagriknaka...

dagiti mannaniw

AURELIO S. AGCAOILI • JOHMAR R. ALVAREZ • ROY V. ARAGON • ROSALIE A. BARNACHEA • ALEXANDER R. BARUT • DEXTER B. BIZ • HONOR BLANCO CABIE • NOLI S. DUMLAO • DEXTER M. FABITO • JOSEPHINE V. HERREMA • JAKE F. ILAC • EFREN A. INOCENCIO • JUNLEY L. LAZAGA • ELMER L. LOPEZ • JOEL B. MANUEL • JOBERT MA. PACNIS • BENJAMIN P. PACRIS • CORAZON F. QUIAMAS • FRED A. QUIBOL •…

Prey-dator

In-inut a timmungraraw
ti nalabasit ken nasileng nga ulo
ti alutiit manipud iti likud ti nakabitin a tela
timmillayon ti akakna
a nailagid iti diding a palo-tsina.

nagsi-am!

ket rimmuar ti pakabuklan ti nangisit a bagina
kimmaradap daytoy a nagpangato
nagsiput!
nakitana ti agarimasa a maung-ungap a payyak
ti mapesaan a kulibangbang iti abut.

inalistuaanna!

dinilpatanna ti wangawangan
sinimaanna sakbay a maunaan.


-Aug 5, 2012
(Diak kukua ti Ladawan)

Sarsarita - 080112

no kasta nga agparmataak,
ar-arapaapek a maysaak nga apoy
a naigayayang manipud iti tangatang
umay manguram iti pakabuklam.
ket ti dapo ti bagim
ikayab ti angin
ket pirsapirsayen nga isuknalna
iti sakaanak.

- jfi

Sarsarita - 073112

ti tao kasla darat ken bato nga iyaon ti dalluyon iti aplaya ngem sabuagannanto met laeng a guyoden ken isubli iti puseg ti baybay.

 -jfi

Sarsarita - 072912

napigsaka a tumatayab,
no ubingka pay laeng
sursuruemon ti sumuba iti angin.

- jfi

Sarsarita - 072012

ti biag kasla daniw, agduduma ti maris ken kaipapananna ket no dadduma ulawennaka.

-jfi

Sarsarita - 071712

ti unnat a buok uray no kasano ti panangsagaysaymo, adda latta sumipadi ti turongna.

-jfi

Sarsarita - 071412

saan nga amin a diro ket agikari iti kinasam-it, ta adda diro nga iti umuna laeng a panangsimsim ket sumam-it ngem singirenka iti kinaalsem iti udina. 
- jfi

Sarsarita - 071012

timmaud dagiti bato nga agduduma iti kadadakkel ken kadadagsenda tapno iti panawen ti layus saanda nga aggigiddan a maiyanud.

 -jfi 071012 



*diak kukua ti ladawan



Allok

kayatko a lagipennakto
a kas maysa nga atab
iti naulimek a bigat
a
kalpasan a maisabuag
ket
sipsipen ti namaga a darat.

Sarsarita - 060312

Saan amin a kayo ket addaan bilid wenno bugas. Nga iti panaglabas iti tawen maiyuged daytoy. Ta adda dagiti kayo nga uray binilangdan ti kalgaw ken panagtutudo ket agtalinaedda latta a narasi. Ket iti panagbilangda iti panawen, bilbilangenda metten ti aldaw nga inda pannakaspak. - June 03, 2012

Isisippeg

iti tunggal aldaw a panangtangadko iti bobeda
itay laeng a nasiputak a dinilpatan
ti alutiit ti puraw a diding
nagin-innayad a timmungraraw ti ulona
manipud iti likud ti ridaw,
inagkagkanna iti namindua sa nagsaltek iti uray la,
nagsardeng ket tinimudna ti aglawlaw
naginana ket inwayatna ti orasion.
simmayengseng ti lamok nga agturong
iti kimmawiwitanna
kinamatna ti lamok a nailabeg
ket inay-ayamna kadagiti dilana,
nagkabukab, ninanamna ti tunggal
lamuyot ti bagi ti insekto.
iti ruar ti tawa,
simmippeg ti angin manipud iti amianan
a giniddanan ti nabiriat a tangatang
idi kitak ti diding, nagalus-osen ti alutiit
a simpok iti abot.
nangibati iti mansa iti birhen a diding.



may 30, 2012

Panakakset

Daras a timmakder ni Nana Merced idi dumanon kenkuana iti sala a pagbuybuyaanna iti paboritona a teleserye ti angot ti makmaksetan nga innapuy. Iti pannakatikawna tapno salbarenna ti agtultuloy a panakaksetna, naiggamanna ti pabitin ti kaldero nga asero nga awan ti rigis a pangiyaonna koma manipud iti dalikan. Naglinamma iti dakulapna ti uges ti kudil a nakesset.

Pinuyotanna ti nasinit tapno maalay-ayan ti ut-ot sana ginaw-atna ti pamunas ket binarabadanna daytoy. Inbalikkuagna ti tangep ti kaldero ket simmabat iti agongna ti angot ti ngumisiten nga innapuoy. Pabpabasolenna ni Tata Carias nga itay pay bigat a pimmanaw tapno agpabaaw iti pudot ti ulona kalpasan iti inda panagsubang gapu laeng iti bassit a banag.

Ket iti panagpanpanunotna no kasanona nga ray-awen ti bagbagina, naimasanna ti nagbuya ket nalipatanna ti lutlutuenna nga innapuy nga itay pay koma a nalinay. Sigurado a madegdeganto manen ti ririda ken lakayna. Amangan ti bassit a rissik ket agbalin a gil-ayab.

Kinitana ti in…

Buya Manipud iti Ngato

(Naiyulog manipud iti “Seen from Above” ni Wisława Szymborska
Parte daytoy ti antolohia nga From View with a Grain of Sand: Selected Poems
a nai-translated manipud iti Polish da Stanisław Baranczak ken Clare Cavanagh   )

Maysa a natay a simmawa ti nakaidda iti bit-ang iti tengga ti kataltalonan.
Nakaurnos ti tallo a pares a sakana iti rabaw ti tianna.
Imbes a riribuk ti pannakaidasay, kinatarnaw ken kinatalinaay.
Saan a nakabutbuteng ti pagteng a kastoy,
bassit laeng ti naokuparanna, manipud kadagiti ruot agingga kadagiti erba-buena.
Naaladan ti dagensen.
Immasul ti tangatang.

Tapno maigaga ti kinakappia ti panunot, pumusay dagiti ayup
iti narabaw a rason: saan da a simmina, basta natayda lattan.
Kasta tay' man a panunoten a nangibati da laeng ti bassit a rikna ken pakalaglagipan;
pimmanawda, iti ammo tayo, manipud iti pabuya a di unay nakaam-ames.
Dida tayo al-aliaen dagiti napakumbaba a kararuada,
ammoda ti lugarda,
ammoda ti agraem.

Isu a ti natay a simmawa iti bit-ang,
rumaniag …

Para Iti Nakaisangratanna No Siasinno Kay' Man

Arsagiddak ita ta mariknak awanen ti siasinoman a makaawat iti marikriknak no di laeng ti bagik. Uray pay ti angin inpaidamna a sagiden ti aangsak. Kayarigak ti duduogan a kayo iti napanawan a disso. Ta iti panagkunak kabusorko amin ti aglawlawko, awanen ti makaimatang ti kinataok ta maysaak laengen pagpigadan a nagilugesan ti amin a simrek ngem rimmuar iti biagko. Bagik ti sainnek ti aglawlaw. Manipud kadagiti nauuneg a sennaay agingga kadagiti kararabawan a rason a di makaawat iti palawag. Binukodanda ti kinasin-aw ket binukudak met ti kinarugit. Natarnaw amin a saoda ket amin nga isawangko bin-igda sinasalawasaw.

Ta uray pay ti pangsakduak koma ti pigsa ket maysa metten kadagiti mangbarbarsak kaniak. Ti pigsa a mangsegged koma ti kababalinko, ti rason no apay a ti lubong ket addaan maris, addaan biag. Nalabbaga a kas iti dara a mangpagunay iti uratko. Wenno maysa a berde nga aglawlaw a manggargari kadagiti matak. Ta ania ti biag a nauspak? Ti biag a nabati, maysa laeng nga arapaap.…

Ti Aluwagi

madama a satsatsaten ti aluwagi ti kalapawna
a tedtedda ti bagyo - iyakarna
dagiti adigi ken diding
iti depaar ti daya ti solarda
a saan unay a matupar ti bales ti angin
iti tiempo ti allawig.

nakarinikna iti saniit ti kudilna
ket ingkeddengna pay laeng ti napan naglinong
tapno palabsen ti init
iti sirok ti mangga iti likud
ti marakrakrak a balay.

nagtangad ti aluwagi - nakitana ti maysa nga umok
iti baet ti dua a sanga -
dua a billit ti agalla-allatiw
kadagiti narurutan a bulong nga agbumbunag
iti arutang ken ruting nga iseksekda
iti naingpis nga umok nga inay-ayam met ti angin,
naguni dagiti sumirsirip nga annakda.

inyuldag ti aluwagi ket inlallay ti mababain nga
angin ti bagina agingga a nairidepna,
nalukag daytoy iti makarikna iti danum
a nagparsiak iti rupana.
nalidemmen ti batogna
siniripna ti umok, natarimaanen daytoy
nagtaray ti aluwagi iti kalapawna
a ganganin marba.



Abril 9, 2012


Agnanayon Nga Ayatem ti Babai ti Abril

(naiyulog manipud iti daniw ni Ogden Nash nga Always Marry An April Girl )

Ibunnannag ti orasion ken bendisionan dagiti an-anting,
Nasapulak ni Abril kadagiti takiagko.
Bimmalitok nga Abril, naulep nga Abril,
Natalinaay, nadawel, nadunggo, naparammag;
Nalamuyot nga Abril iti aglaladut a panagsasabong,
Nasalemsem nga Abril ken kellaat nga agpungtot,
Agnanayon nga agbalbaliw, agnanayon a sipupudno --
Ay-ayatek ni Abril, Ipatpategko la unay.

(Abril 7, 2012)

Linamma iti Papel

(para kenni AJ)

napatak ti pannakaikur-it dagiti linamma iti papel
ta naibinggas ti pakasaritaan kadagiti kurbada
a lasaten ti nangisit a tinta
kasinginda ti alimbasag iti tunggal panagtuglep
tapno tuldekanna ti parapo ti tawen.
kas nakunak kenka saan nga umulog
dagiti bituen iti sanguanam tapno pidutem,
ken awan ti agdanan ti langit nga uliem
ngem addaan daytoy iti ridaw
para kadagiti makasukisok
tapno ti plumam ikur-itmo met.



March 22, 2012


Panangitan-ok iti Simmina a Tumatayab

binantayanna ti kahon iti agpatnag
maymaysana a nangarakup
iti agpatnag ken nangandingay iti bagi ken
ti panunotna a mangbiag iti lagip.
inyennekna amin ti riknana ta iti maudi a gundaway
pasigton a tagikuaen dagiti maibattaway
nga ellek ken sapri dagiti dumges a lua ti amin.

bagtit kunada,
kasungani idi kalman
ti panagpasinana ita
saan a kas ita ti riknana
agpada a naikahon dagiti dua.
idi kalman nagpaggaak iti uray la
nalag-anan iti nailisi a pandag iti barukongna
saanton a makarikna dagiti lasag
iti pigsa a gubuayen ti napanpannuray a kapisi ti pigsana.

no idi kalman, kasla kapas laeng
ti kahon a binaklayna,
ti linaon a katukad ti dagsenna
itulodna iti abut
tapno isaklangna amin a babantot.

ngem ita, tunggal aksaw
katukad ti pannakaikaranukonna
kasla kalkalienna ti bukodna
nga abut ket iti ungto ti rangkis
awisen ti ila ti isusurotna.




March 22, 2012

Panangiburay

apagukisna pay laeng ti saba
a nasukainanna iti basket
idi makitana ti billit iti igid ti sareb
agsipsiput daytoy,
binugawna,
immakar ti billit iti sirok
ti bangsal, nagsukain kadagiti bimlad nga innapuy
manipud iti nalitem a danum a nagapu iti naginnawan.
inkuraykay ti billit dagiti sakana,
naguni a tanda nga awan pay ti nakilnogan
sipud pay itay bigat.
ilayatna koma ti kumittab idi
naganit-it ti tarangkaan,
naiduron ti rikep
ket naikuadro iti ridaw
ti ubing a mangap-apros iti tianna.
indardarasnan ti kimmitab,
apaglagid ti sam-it ti kullapit a saba
a nagdisso iti dila ken bibigna.
inyulana met laeng
binarsakna ti billit iti apagkittab,
sinippit a dagus ti tumatayab ti
nagtulid iti daga.
ti natna inyawatna iti ubing.
inubbana, sada kinita ti billit
a nagdisso iti umok iti sanga ti mangga.



March 18, 2012



Aginaldaw A Mangngegak Ti Danarudor Ti Danum

aginaldaw a mangegak ti danarudor ti danum
agdungdung-aw
naleddaang a kas sallapingaw,
agmaymaysa nga agtawataw
mangngeganna ti iriag ti angin iti danum a kawaw.

ti nauspak nga angin, nalam-ek ti palayupoyna
no sadinno ket isu't papanak
mangngegak ti danarudor ti danum
agingga iti kaun-unegan
inaldaw, rinabii, mangngegko nga agpussuak
agkarasubli.


March 11, 2012

(Naiyulog manipud iti "All Day I Hear the Noise of Waters" ni James Joyce)

Namnama iti MV Logos

Ti MV Logos Hope ti kadakkelan kadagiti floating bookstore iti sangalubongan. Agakar-akar daytoy iti 160 a pagilian. Imet daytoy a barko ti lima ribu a titulo dagiti libro.


Damona daytoy a barko iti Filipinas nupay iti napalabas a tawen ket bimmisita metten iti pagilian ti MV Doulos. Makuna a naparaburan unay dagiti Filipo a naadaan iti gundaway a makita daytoy uray iti mano laeng nga aldaw.

Kadagiti mayat a kumamakam. Masarakan ti barko iti Pier 15 (likud laeng ti Manila Hotel). Agingga laeng iti Marso 13 ti book fair san'to agturong iti Subic Zambales.



















Iti Labes ti Kortina

indumogna a siiggem iti aglatlati a tubo
a naipatakder iti sapal ti agdan,
kas kabaaw itan ti landok
ti riknana a kalpasan
ti nabara a panagsisinnukat dagiti sao
inugasanen ti lua ti riknana.
kawawen ti sala
nga itay ket agallangogan
iti agduduma nga uni,
iti tanoktok ti takong nga umuli-bumaba.
silulukat pay laeng ti ridaw
a nakaiburuangan ti anniniwan.
inyangadna ti rupana,
ket nagtaray a napanna sinabet ti alintatao
iti labes ti kortina.
apungolenna koma
ngem nagkayab manen ken inwalin ti angin ti
alintatao iti labes ti langalang.
sitatalna itan daytoy a naipauyaoy ket
linangebanen ti tawa.



Feb 11, 2012


(Original a berso. Basaen ti Bannawag bersion iti Marso 12 nga isyu ti magasin.)

Kadagiti Rabii A Naatap Ti Ridep

Kadagiti rabii a naatap ti ridep
pamrayak nga iyilad iti dagidagi
a kabadang ti natiliw ken naipupok nga espiritu,
aprosak ti nakettangan a sibet
a binibineg ti agmalmalem a pannakidangadang
iti garaw ti bumallasiw nga init iti lulonak.

Manipud kadagiti abut ti nalaga a way
limlimmuek ti nautoyan a lasag
bareng adda kaibatoganna nga agas
ti lasag a paimbagen ti bukodko met laeng a lasag.

No laeng koma kasla dagidagi dagiti pasamak
diak koma kasapulan pay a salaysayen ti pagteng
ti nawatiwat nga agpatnag
ta agsubli latta koma iti naggapuannana
ti pigsa a katukad met laeng ti maysa a pigsa
nga ay-ayamen ti tali
a no maminsan awan kasiguraduanna
a makaadayu ket agtalinaed latta a sibibitin.

Mauma kadi ti lagip?
wenno agpatingga kadi ti birtud ti agawaaw a basi
a mangsapsapu iti natikagan a karabukob?
saan ket ngata.
ta kas iti dagidagi a mangitultulod kaniak ita
iti awan patinggana a panagpallayog
imasekto latta ti tunggal rud-ak
a naisalugsog kadagiti ramayko
iti tuggal iyagawak a rak…

Art Republik

NEWS RELEASE
New TV show on Filipino artists airs February


Art Republik, a new TV show that features Filipino artists, debuts February 28 on Knowledge Channel at 8:40 p.m. Art Republik is a 30-minute program on Philippine arts and culture, profiling 51 artists from various art fields and two art collectors or a total of 53 guests for its first season. The first season of Art Republik carries 13 episodes anchored on themes, which are based on cultural traits.

The cultural traits used as episode themes include close family relations with a focus on siblings' relationships, respect, Bayanihan, adaptability, hard work, responsibility, strong sense of community, commitment, courage, quality, sentimentality, excellence, and perseverance.

For the first episode, Art Republik features two families involved in the fields of independent film and the visual arts: the Lee Brothers and the Dalena sisters. Roxlee is the hero of underground cinema; Romeo Lee commonly known as Lee is a Univer…

Ti taaw

tunggal pungtot nga ibbatan ti tangatang
iti batogna a taaw
sipapakumbaba a mangallawat daytoy
iti amin a banag nga itedna
uray pay ti lua iti nasapa a malem
wenno iti nakamisuot a bigat
nga agur-urok ti daya iti likud dagiti nimbus
urnongenna amin dagiti matnag a lua
nga isunto ti pagsarmingan
dagiti immasul a mata
no nalpasen ti panagsangitna.


2/15/2012

Ti Nalinongan

Naiyaplagen ti sipnget idi dumanon da Nana Merced ken Tata Carias iti pagtaenganda. Ti lakay napan nagdiretso iti sala a nagbuya iti telebision. Intugaw met ti baket iti butaka a naiyariping iti sango ti balkonahe. Nabannogan unay iti panagriknana ket inyunnatna dagiti sakana. Saanen a nagluto pay iti pangrabii da nga agassawa. Adda pay nabati iti sidada itay aldaw. Idadangnanto lattan. Gagangay a kasta da a dua.

Nariing ti baket iti sellag ti bulan a naitiro kadagiti rupana. Nairidepna gayam gapu iti kettang ket iti palayupoy iti mababain nga angin ti sardam. Perpekto ti kinatimbukel ti bulan. Nalawag daytoy ngem ketdi awanan pudot a kas iti init.

Ita laeng a madlaw ni Nana Merced ti maysa a mulana nga atis iti arubayan, kataytayag met gayamen dagiti dua kalamansi. Kasla kaano laeng nga inyakarna daytoy manipud iti puon ti lubeg. Maysa a nakuribateg a semilia daytoy idi a di makatayag ta linongan ti nataytayag a mula. No iti matutudo, arbis laeng ti maraman daytoy. Iti met kalgaw ke…

Panangipulang

Tinulungan ni Nana Merced dagiti anakna a nangikarga kadagiti gargaretda manipud iti aparador ket insiledda kadagiti luggage. Ti napno itay nga aparador itan ket kalawakaw. Kasla kaano laeng a kalawakaw dagitoy ket iti apagdarikmat napunno, ita awan manen ti linaonna. Awan timtimek ti tunggal maysa. Agpipinnaliiw ti tunggal maysa. Namin-anon a daras a napasamak ti kastoy ngem agpapan ita adda latta kinadagsen a marikna ni Nana Merced. Kasla iti tunggal bado a maipisok iti paglaunan ket dumagsen a dumagsen ti panagriknana.

Apaman a napunno dagiti luggage ket ginuyod met ni Tata Carias dagitoy a nangisimpa iti likudan ti AUV a luganda. Idi nasiertoda nga awanen ti nabati pay ket saggaysa a naglugannen dagiti annakda. Ti katkattawa a nangbiag iti balay iti sumagmamano nga aldaw ita nagmawmawen.

Apagsagpat iti departure area ti lugan, sinaggaysa ng imbabada dagiti kargada. Nagsisinsinanda a naggiginnuyod. Nagpipinnakadada. Ket idi masigurado dagiti lakay ken baket a nastreken dagiti ann…