Agas


"Ma, dumaw-as tay man pay sadiay drugstore sakbay a mangan tayo dita foodcourt. Medio simmakit daytoy ulok." Ket tinapaya ni Eleonor ti ulona.

"Dayta siguro puyat tayo idi rabii 'nakkong. Agtugawka laengen ditoy ta siak ti mapan gumatang." Imprisintar ni Nana Merced iti anakna.

Nagdardaras ti baket a napan iti ground floor ti mall, iti masungad ti supermarket adda sadiay ti botika. Parbangonen itay nalpasda a nagsasango a nangan ken nagsasarita. Kasla di maputpot dagiti estoria maipapan ti kinaubing dagitoy. Linagipda dagiti nagpasaranda a rigrigat ken no kasanoda a linabanan dagitoy agingga a naparmekda ti pannubok.

Idi makagatang ni Nana Merced ti agas ti sakit ti ulo ket nagdardaras met laeng daytoy a nagsubli iti ayan ni Eleonor. Kinita ti anakna ti agas ket natakuatanna a nagpason daytoy iti naituding a pannakailakona koma.

"Ma, expired dagitoy agasen, ne!" Ket impakitana ti petsa a nailanad.

"Diakon nabasa pay ta permi ti danagko. Agurayka ta innak isubli. Dagitoy nga aglaklako, imbes a makapaimbag ti ilakoda saan ta amangan no maisagmak pay ti gumatang."

"Siakon, Ma. Mudtoy ta resibo ta innak isukat. Gumatangak pay ti dadduma nga agasko." Ket timmarengtengngen ni Eleonor.

Ita kasla ni Nana Merced met ti maulaw. Aglalaok ti marikriknana. Awanto ti ania man nga agas a makapaimbag iti iliwna no pumanawto manen dagiti annakna.


01/03/12

Post a Comment