Andador



Kalpasan a nabayadan ni Eleonor ti sapatos a napili. Ginuyod met ni Nana Merced daytoy iti sektion a para kadagiti ubbing. Napanunot ti baket nga igatangan ti apokona kenni Efren iti teether tapno di la ania ti maisubsubona a mulmulan. Agpangipenen daytoy ket pati ti ramay ti amana ket pagngarietanna no kua.

Agpilpilida idi madungpar ni Eleonor ti maysa nga ubing a nakasuot kenkuana ti andador. Agarup siguro a sangapulo a bulan daytoy. Gangani daytoy a natuang. Imbag ta nasarapa ni Eleonor daytoy ket ginuyodna sakbay a matulid. Umlek koman daytoy iti pannakakellaatna.

"Hello cutie, ayan ti nagannakmo?" Inaprosanna ti rupa ti ubing. Ket naggarigik daytoy.

"Mam-ma! Mam-ma!"

Agdardaras nga umasideg ti maysa a babai.

"Sori, miss! Inpaipadasko kenkuana dayta nga andador ngem inwadagna ti imak ket nagtarayen." Inubbanan ti babai ti anakna. Ngem agalus-os ta kayatna ti agsubli iti andador. Inpatakder ti mamana iti igid ti andador ngem gangani manen natulid.

"Kasta a kastaka idi Eleonor. Diam kayat ti mabiangan ken diam kayat ti makibin. Permi ti butengmi idi iti amam ta amangan no madunorka iti kinaalikutegmo. Kasla kaano laeng daydi." Agkatkatawa ni Nana Merced nga immasideg met.

"Okey laeng. Kasta a talaga ti ubing." Insungbat ni Eleonor iti babai.

"Cutie, denggem ni mamam tapno dika madisgrasia." inaprosan met ni Nana Merced ti ulo ti ubing.

"Sige 'garud agyamanak unay, ha. Inkam' 'pay bayadan daytoy andador." Ket pimmanawen dagiti agina nga agturong iti cashier.

"Wen, gayam 'ma. Ayan daydi andadorko idi bassittak?"

"Awanen, a. Naperdi daytoy idi binulod ti kaaruba tayo."

"Sayang."

"Diam kunaen nga agandadorka met? Bakbaketankan."

Nagkatawa ni Eleonor. Uray ita, dinan kasapulan ti andador ta ammonan ti magna iti nalinteg nga awan ti mangkibin kenkuana.

"Siakto met ti andadoryo, 'Ma."


-01/02/11



Post a Comment

Popular Posts