Halo-Halo




Nakamisuot ni Eleonor a napasungadan ni Nana Merced iti nagtugawanna a bangko. Sumro manen ti ugalina kunkuna ti baket. Kanayon a dillawen ti anakna ti kasangona aglalo no isu ti immuna a nagsupladaan dagiti dadduma.

"Nakipinnapilitak pay iti kahera ta gangani dina aminen a kukuada daydiay agas nga isukatko uray no adda resibok. Nagangayanna kinasaritak pay ti managerna tapno ibagak ti kasasaadko. Pinaalak pay ti karton ti agas a nangalaanda tapno mapaneknekan nga isuda ti ayan ti biddut. Di isuda ti nagpadispensa idi nakitada. Libre pay ketdin daytoy intedda kaniak a kasukatna." Nakakuretret ti muging ni Eleonor.

"Kustonan dayta. Kitam ket sika ti kitkitan dagiti tao." Indillaw ti baket sana pinatugaw ti anakna.

"Lallalo ketdi a simmakit ti ulok. Mabalin met a maala iti maminsan laeng a saritaan, paatiddogenda pay laeng."

"Nakkong, saan amin a tao ket naiyanak nga agpapada iti kapanunotanna. Ta isu ngarud ti pakakitaan iti kinatao ti maysa a pinarsua. Inta ket agmerienda dita foodcourt tapno bumaaw dayta im-impenam." Inyawis ti baket. Ginuyodna nga inattibay daytoy.

Nagturongda a gimmatang iti maysa a sangay ti nalatak a restoran. Nagsinsinanda ti gimmatang iti puto nga adda dinardaraanna ken halo-halo.

"Daytoy ti kailiwko unay ditoy Pilipinas, ti halo-halo," sinudsudan ni Eleonor ti basona kabayatan ti panangramramanna. "kurang sa ti sam-itna."

"Kusto met kaniak." Kinuna ni Nana Merced. Ikiwarkiwarnan ti basona.

"Innaksa dumawat ti nayonna nga asukar, 'Ma." Tumakder koman ngem inggawid ti baket.

"Tunawem amin pay ta yelona samonto ramanan ulit. Tuturem samonto isam-ol. Pagnadnadem tapno marunaw a nasayaat."

Ket nagdisso ulit ti ubetna iti nagtugawanna. Inaramid ni Eleonor ti imbaga ti inana.

"Mabalin a saan tayo nga agpapada ti panagraman 'nakkong no ipapilit tayo ti banag a di tayo pay natakuatan. Mabalin nga adda kadagiti ramen dayta a halo-halo ti mangpasam-it kenkuana. Samonto la maramanan ti sam-it no nagtitipondan. Adu dagiti bambanag a kunaen tayo a narabaw ngem no takkuaten tayo iti kaun-unegan ti maysa a banag amangan ta adda sadiay ti kupkupikopanna a kinasam-it. Padasem a ramanan man ita."

Nangisubo ni Eleonor. Ninayonanna iti rekado ti kutsara.

"Agpaysoka, 'Ma. Nasam-iten daytoy halo-halok."


1/04/12

Post a Comment

Popular Posts