Ti Sapatos




Kompleto dagiti aldaw da Nana Merced ken Tata Carias ta simmangpet dagiti tallo nga annakna a naggapu't Amerika. Nagbakasion dagitoy tapno iselebrarda ti Paskua ken Baro a Tawen ditoy Pilipinas. Tunggal maikadua a tawen nga agtutulagda nga agawid tapno makadennada ida.

Kalpasan a nakainnaw ti baket iti naaramat a naglutuanna iti nagsasanguanda idi rabii para iti media noche ket inawis ni Eleonor, ti buridekda nga anak a babai a mapanda iti mall. Aggatang kano iti itugotna nga agsubli iti Amerika ta nalaklaka dagiti magatang ditoy.

Nagtarusanda ti napan nagpili iti sapatos. Nagbidingbiding met ni Nana Merced ta amangan no makakita iti mayat a para iti anakna. Pinilina ti nalabbaga nga addaan iti natayag a takongna. Bagay la unay kunkunana ta immala kenkuana ti tayag. Idi masiguradona, pinayapayanna ti anakna. Immasideg met daytoy ngem bitbit ni Eleonor ti napilina.

"Kitam daytoy nakkong. Nagpintas 'ne. Alamon sayang."

"Napintas nga agpayso 'nang." Binagkat ni Eleonor daytoy sana minira.

Mayat ti diseniona ngem idi miraenna nasiertona a naaramid laeng daytoy iti artipisial a lalat. Di a makaandur iti lamiis ken pudot sadiay ballasiw-taaw. Nagkuy-os ti rusokna ta malagipna ti sinturon nga ibaot kenkuana ti asawana iti tunggal mabartek. Idi di a makapagteppelen indeborsiona daytoy kalpasan ti makatawen ta dina maibturan ti kinadangkok daytoy. Inreto daytoy ni Nana Merced idi kenkuana. Maysa nga anak ti kumarena ngem sadiay metten Amerika a dimmakkel. Maadaannakto ti guapo nga apoko ta adda langa daytoy agbalin a manugangko. Permi ti panangdaydayaw idi ti baket.

Impadasna ti sapatos a pinili ti inana. Ngem kasla pespesenna dagiti ramay ti sakana ken dina maibturan ti katayagna ta ingatona unay ti butoyna. Urayla napadiwig.

Inisemanna ni nanang ket nakapagdesisionen ipadasna met ti bukodna a pili.

-01/01/12

Post a Comment