Music Room








kadaytoy kuadrado a nakubong a siled
a pinaidaman ti lawag,
aggi-innagaw ti pangaddua a kas
iti dangadang ti lam-ek ken kalgaw
a di agtugmok, ta agbinnallaet nga 
agdumog ken tumangad ti tawa
ti artipisial nga angin ti aircon.
manipud iti lawag ti telebision,
katibnok latta dagiti nawawasnay a saka
ti kumud-ay iti dalan, 
dagiti dua a bumaro a kabalio
aginnunada a makadanon iti ungto.

ket daytoy ti mulmulagatan 
a pagsinsinnukatan ti dua nga anniniwan
ti mikropono a saggaysada nga ig-iggaman
kumkumpaniaranda ti ritmo, 
ti dayyeng, dagiti nota a ngumato 
ket no dadduma nakangatngato 
a dida magaw-at ken
a maalimon ti natikagan a karabukobda
pagkaykaysaenda dagiti timek
ti anangsab, ti sagabasab,
ti anal-al a mangkamat iti tunggal maysa
kabayatan nga am-ammalanda ti bote 
ti aglingling-et a serbesa.

uray la agpayegpeg ti tugaw
a naabongan ti birhen a tela
ket iti tunggal itatakder ti maysa
maikayab a sumurot iti bagida
makunes, makumel, mabinnat ket agranitrit.
pagdanggayanda ti nota
bagi ti maysa ti akingato
ket akuen ti maysa ti akimbaba.
agngarietda a pagipapasan 
ti agdalan a linia
wayawayaanda ti naibalud nga espiritu.

iti telebision, nadaleb ti agkarkarera
a kalpasan a naungpot ti kalsada
naunnat dagiti nabannogan a saka 
a kas met iti pannabanitog ti lamisaan 
ken pannakatulid dagiti bote ti serbesa 
danggayan ti agligsay a sagabasab
ti agrarek nga aircon
ti karabukob a napaayusan
ti anabaab ti parbangon.




- December 9, 2012

(diak kukua ti ladawan)
Post a Comment

Popular Posts