Sarsarita - 102612




ang wagas na ulan ay bumubuhos ng dahan-dahan.


- Oct 26, 2012

Sarsarita - 102512



No karitem ti lawag, siguraduem a nalawlawagka ta no saan agbalinkanto laeng a kulalanti iti kasipngetan.


- Oct 25, 2012

Baina ken Buneng





Ganganin nalikaw amin ni Nana Merced ti amin a suli ti balay. Di met laengen sumangpet ni Tata Carias.      Agmaysa orasen a binay-anna a nakatakkub ti pinggan iti lamisaan. Itay pay a nagsebo ti digo ti lauya a baka a nagrigrigatanna nga iniwa iti kutsilio ta awan ti natadem a buneng ti lakayna. Ti laeng lalat a baina ti nakitana a nakabitin iti ngatuen ti kasuoran.

Alikumkumenna koma ti pinggan idi maiwalin ti abbong ti ridaw a kumamang iti sala manipud iti kosina. Ni Tata Carias ti naikuadro. Awanan timek a simrek. Narusanger ti suot daytoy ta tanda ti dina panagsukat iti dua aldaw. Simmango iti lamisaan ket imparabawna ti buneng. Nakigtot ni Nana Merced idi maitupak daytoy iti rabaw ti lamisaan. Uray la naglagto ti tinidor ken kutsara. Namarkaan ti nasilap a buneng iti nagkiggang a dara.

"Mabisinkan? Innak laeng idadang diay sida." Timmalikod ti baket.

Agsubli koma ti baket a mapan mangala iti malukong idi magaw-at ti punguapunguanna. Agpukkaw koma nga agpaarayat ni Nana Merced ngem apagisu met a nadippit iti bibigna ti bibig ti maysa a parsua. Ni Tata Carias!

"Pakawanennak, baket!" Sana inungngo daytoy iti nabayag.

Agawaawen ti singaw ti agburburek a digo. Nagwaras ti angot ti napalukneng a lasag.

"Agurayka ta mangalaak iti pagaw-an. Inka agtugawen ta sumarunoakon."

Situtulnog ti lakay a napan simango iti lamisaan.

Idi kitanna ti kasuoran, addan sadiay ti buneng a naiserrek iti bainana.

Ket sakbay a bumaaw ti digo, binagkatnan ti malukong a pagsanguanda nga agassawa.



- Oct 24, 2012


(diak kukua ti ladawan)






Sarsarita - 102212


dagiti tao dumtengda iti biag a kasla angin, no dadduma adda dagitay nabanglo nga uray no nakapanawdan agbati ti angotda iti lagiptayo ngem adda met daytay dakes nga angin a kasla uttot nabangsit la ngaruden ngem apagbiit laeng.

- 10/22/12

Impes a Pilid






Kas itay naglaba ni Nana Merced a pinagsisinana dagiti bado, kasta met laeng ti inaramidna ita ta kupkupinenna dagitoy. Uray napaglasinna dagiti marisda ket pinagsisinana manen dagitoy segun iti pannakausarna, ti para uneg wenno parabalay ken para ruar wenno parapasiar

Bagkatenna koman ti umuna a pempen dagiti bado a nakupin idi mabanugbog ti tarangkaan a landok. Natinnag ni Nana Merced ti bado a binagkatna ket nairang-it daytoy kadagiti napempen. Uray la limmabba ti ulona ket pimartak ti bitek ti barukongna. Immapay ti isipna ni Tata Carias ngem apagdarikmat laeng ta no koma ti lakay daytoy ket saanen nga agtoktok pay. Addaan daytoy iti bukod a kopia ti susi.

Nagdardaras ti baket a napan nanglukat ti ridaw. Masisirap ti mata ti baket a natiruan iti raniag ti init iti likudan ti tao. Dina masinunuo no nagkitadan wenno agam-ammoda. Ti ammo ni Nana Merced saan a taga ditoy ti lalaki.

"Apay kadi, Apo?"

"Nana, pasensia laengen iti panangsingak kadakayo. Emergency laeng koma no adda pannakabalinna. Bumulodak koma iti pangbomba iti pilid. Impes gamin daytoy pilid ti motorko. Addansa bettakna. Kuna tay nagdamagak dita bangir ti kalsada nga adda kano gamigamyo."

Siniripna ti baket ti motor a naipagid iti sementado nga alad. Impes ti akinlikud a pilid daytoy.

"Agurayka, barok, ta innak alaen ti remienta ti lakayko."

"Iyun-unakon ti agyamanak, Nana."

Timmalikud ti baket a napan a nangala. 

Inyawat ti baket ti pangbomba ti pilid. Naminsangapulo laeng a pinababa-a-pinangato ti takiag ti lalaki ti pangbomba a ramienta ket nagporman ti sukog ti pilid. 

"Agyamanak unay iti adu, Nana. Diakon ibaybayag pay. Ipakitak iti vulcanizing shop daytoy damdama, amangan ta adda naipalok a lansa." Inyisem ti lalaki a kas tanda ti panagyaman la unay daytoy.

"Awan aniamanna, barok."

Ket pinaandaren ti lalaki ti motorna.

"Imbag ti pilid ta no impes ket mabalin a kargaan ti angin ket mabalinto manen a tumaray ti lugan. Ti relasion narigat a puntaan, no dadduma nalukneng no dadduma agpinpinnatangken. Diaske a laklakayan no kaano a limmakay isu ti panagkaskastana."


-10/21/12

(diak kukua ti ladawan)

Ti Imres a Pantalon




Iti panangisalapay ni Nana Merced kadagiti bado a nalabaan nadlawna ti maysa a pantalonna a kasla imres. Daytoy daydi impasarabo ni Eleonor kenkuana. Naminduana pay laeng nga inusar ta nalawa kunkunana. Pinaputedna pay ta medio atiddog ket sumaringgayad ti murdong na no kasta a magna. Inbilinna iti sastre idi sakbay a daitenna nga iyanayna iti apag-usto laeng. Total saan metten a tumayag pay. Ti laeng amakna ket amangan ta lumukmeg, dinton umanay pay.

Ginaw-atna iti salapayan ti pantalon a naka-hanger, kinarawana ti bulsa daytoy ket apag-isu met a medio namagaanen. Naingpis ti tela a nausar. Simrek iti balay a bitbitna ti pantalon. Awan pay ni Tata Carias. Immaplaw ti angin  a simrek kadagiti tawa manipud iti amianan.

Nagbassit ti nagsubanganda ngem nagdakkel ti pinarnuayna a riribok kadakuada. Iti laksid ti kumbeten a kudilda a dua ken dagiti nagpaspasaranda a rigat iti biag ket nalakada la koma a pagsaritaan daytoy. Saan ketdi nga inuubing ti pagarienda nga ugali.

Inikkat ni Nana Merced ti akinbaba nga abbong ti bagina ket insuotna ti pantalon. Isiperna koman daytoy iti naguni ti telepono iti sala. Nagangayanna, natnag ti pantalon. Kasapulannan ti sinturon ita.


-Oct 20, 2012


(diak kukua ti ladawan)


Sarsarita - 102012

Ang ambisyon ay kahalintulad din nang mga drafts sa blog, gusto mo man tapusin nang minsanan para maipost at mabasa ng lahat pero hindi pala pwede. Kailangan mo rin pala isa-isahin at bigyan nang sapat na panahon ang bawat isa . Planuhin ang bawat salitang isulat, ang takbo ng kwento kung paano tapusin ang nasimulang gawain. 

10/20/12
- JFI

Sangabatia a Danum




Kalpasan a nakapammigat ni Nana Merced. Napanna binagkat ti pagiikanna iti mureng. Inlasinna dagiti de-color manipud kadagiti puraw. Inkuladana daytoy sakbay a gelgelanna tapno nalaklakanto ti pannakaikkat dagiti kimpet a rugit.

Saan a simmangpet ni Tata Carias idi kalman ket nagmaymaysa ti baket a naturog iti balayda. Iti ipapanna pananggatang iti sabon itay, adda nakaibaga kenkuana a nakitada ti lakayna idi rabii a nakiininum kano kadagiti kabaddungalan sadiay outpost ti purokda. Inamad ti kaarrubada no adda kadi ti problema ti lakay. Imbagana lattan nga awan. Nasanay gamin dagitoy a dida makitkita ti lakay a makiininom no awan la ketdi ti padaya wenno selebrasion.

Nagipapasan ni Nana Merced a ginelgel dagiti puraw a bado. Idi nalpas, pinekkelna sana imbato iti agur-uray a sangabatia a danum a pangbalnawanna. Gapu iti pungtotna, napigsaanna iti panagibatona ket nagangayan simmabuag kenkuana ti danum a nakabasaan ti suotna. Ti nalinak itay a napno iti danum a batia ket nagal-alikuno a nalipias. Nabasa agraman ti aglawlaw. Intanebna ti linabaanna a bado ket pinaturayna a naikkat dagiti labutab ti sabon. Iti panangingatona, maysan daytoy napudaw a bado.


- October 20, 2012


(diak kukua ti ladawan)

Sarsarita - 101012





ta uray dagiti bato dida ibaga a nadagdagsen ti tunggal maysa kadakuada. 




 - October 10, 2012


*diak kukua ti ladawan

Ti Tasa






alay-ayennakto ngata
a kasla tasa
ket sappuyotennak iti pagiggamak?
tanangem kadi dagiti sakam
nga umuli iti agdanan
tapno ti anabaab iti kaunggak
ket makubong a di matnag iti suelo?
ibbatannakto ngata
ket buyaem ti pannakabuongko
no masinit ti ramaymo
iti panawen ti panagsalam iti balse?
ayatennakto pay ngata
a kas idi damo
ket urayem ti ibabaawko?
idupudopmonto pay ngata
iti bibigmo ket umisemka
no riniingkon ti panagtuglep
kadagiti ur-uratmo?


- Valenzuela City | Oct 2, 2012

(diak kukua ti ladawan)

Panangipasirip




Gapu ta Oktubren, ipasiripko man daytoy madamak nga i-edit a saritak nga agingga ita ket diak malmalpas iti panangyallatiwko manipud iti Filipino versiona. Bareng mawayaak ket malpasko met laeng.



Manipud iti bulsa ti kusapo a denim a pantalonna nangarikap iti baria ken pinapel a kuarta. Nagbilang ken nagkwenta. Dua gasut ket limapulo-pito a pisos. Daytoy ti nabati iti makadomingo nga allowance nga inted ti inana idi Lunes. Ket sakbay a mapakudkod iti ulo no kasanona a pagkasiaen ti nabati a kuartana lalo ita ket makigasanggasat, inyawatna iti baket a kahera ti maysa a Manuel Roxas a pinapel ken tallo nga Emilio Aguinaldo a baria a kas bayad iti panagserrekna iti sinean. Kagiddan ti tiket nga inawat ni Rene ti isem a pagigis nga insukli ti babai a kahera.
Adda iti maikadua a kadsaaran ti sinean. Immuli ni Rene iti perdi nga escalator. Ganganina lagtuen dagiti palapad ti di gumana nga agdanan. Simmabat kenkuana ti pasilio a pagtutugawan dagiti lallaki. Adu ti kas kenkuana nga agtutubo a nakabado pay iti pang-eskwela. Bitbit dagiti kuadernoda. Adda met dagiti nataengan a kasla agsipsiput iti amin a garawda. Dagiti dadduma sumipsipsip iti softdrinks ken dagiti dadduma agpaypayubyob iti sigarilio a nakaipit kadagiti ramayda. Iti pannagnana a mapan iti ridaw ti sinean, natiliw ti suli ti matana ti maysa a lalaki a nakaturong iti imatang kenkuana a kasla man rukrukodenna ti taktakderna, ti kaddakkel ti aniaman a nakalemmeng iti briefna ket pinasurotanna pay ti sagawisiw ken ikikita a pangato-pababa.


(diak kukua ti ladawan.)