Skip to main content

Posts

Showing posts from 2013

Sarsarita - 121513

Kasla ta magnetic field, uray no timmalikud ti maysa mabalin ta latta ti agsarita ket risuten ti nagbaetanta ngem no agpadatan a timmalikud isunton ti manipudan a talaytayen ti tunggal maysa ti ungto ti lubong.

Prosa - 111013

Iti panagkunak, kada addangko imulak ti bagik, addaaan ramut dagiti dapanko a mangibati ti tugot iti daga ket iti kada aksaw diak bilangen, diak taliawen no mano ti nabati. Dagitinto makasurot iti dayta a dana ti mangbilang ket no kaspangarigan awanto man uray maysa bay-anto latta a maunas a kas ti anniniwan a timmipon iti kasipngetan.

Sarsarita - 110713

Kaslaka kayo ti mansanita nga addaan iti nalapad a sanga iti igid ti dan-aw, saka laeng marikna ti pigsam no agtinnag ti naluom a bungam. Mariknadaka ngem apagapaman laeng.

Sarsarita - 110613

Ti daniw ket kasla met init, agduduma ti lawagna iti tengnga't kabakiran. Makastrek kadagiti pinuon a mangawat iti rayana ngem nalidem kadagiti dadduma a depaar a di mangalawat iti kinangayedna. November 06, 2013

Panangipadigo

Mangrugin nga agsaknap ti sipnget idi dumanon dagiti agassawa iti balayda. Bimmaba nga immuna ni Nana Merced tapno warwarenna ti naiputipot a kandado iti tarangkaan. Winadaanna ti agsumbangir a parte daytoy tapno nalaka a makaserrek ti lugan a manmanehuan ni Tata Carias.

"Lakay, makaamokan a mangisarado kadayta tarangkaan ta innak biit mangipisok." impakada ni Nana Merced iti lakayna. Imbatida gamin amin ti naisupot itay kada Indong ken ti anakna.

Isarado koma ni Tata Carias ti tarangkaan idi mapasungadanna ti maysa a dyip a nakasilaw ti headlaytna. Naglaon iti agduduma a karga. Pati ti bubungan daytoy ket napnapno iti ramramit nga aplayanses kada tugtugaw.

"Amangan ta dayta diay ibagbagada a baro a pamilia nga agupa." Naitanamitimna. Napan gaminen sadiay Amerika ti akinkukua ti kaabayda a balay. Ket ti laeng kabagian daytoy ti mangkitkita. Imbes a bay-anda a nakatiwangwang ket pinaupaanda latta tapno uray kano kaskasano adda mangkitkita ken mangdaldalus iti agla…

Prosa - 102213

Adda met panawen a kasapulam ti agbatay nga agmaymaysa. Maysa nga aweng kenka ti uni dagiti payyak a pimmanaw. Suotennaka ti angin iti kinaagmaymaysam iti pagbatbatayam a kable. Dita a tantiaenna ti kinaandurmo, no kasano ti kinapigsam a kumpet iti kable, no kasano a salaam ti panangsutilna kenka. Ti napateg la unay dika paatiw iti puyopoyna.

Prosa - 101113

Ti panagsangit ket saan a klase ti kinalupoy ngem ketdi maysa a pangiruaran iti saem tapno uray kaskasano ket mapaglag-an no di man maagasan ti karkargaen ti barukong.

Prosa - 100813

Ammok ti karirikna ti dimmapo
nga ulep a nagtubo manipud iti awan
tapno umayna langeban
ti rupa ti tangatang nga ayan
ti lawag nga idi pay sapsapulem.
Ammok sumangpetka,
maysa a nalamiis nga angin.

Sarsarita - 093013

Tangtangadek nga inaldaw dagiti billit a lablabsak,
nakaparabawda manipud iti kable ti koriente,
damdamagek iti bagik ania ngata no maysaak kadakuada?
ania ngata ti rikna ti addaan payyak?
iti tunggal panagtangadko,
agdumogda met
ket buyaenda
ti tunggal aksawko.


(diak kukua ti ladawan)

Sarsarita - 092013

kasla danum ti maysa a burayok a dumges dagiti balikas,
ket kas maysa nga agtatakaw iti oras,
alaek amin a gundaway tapno daytoy ket ikaranukon
- iti kalawakaw pay a bay-on...

Atep ken Lawag

Diak ammo no siak ti atep,
maysa nga aglatlati,
rutay-rutay,
ad-adu ti lusulussok a pasetna
ngem iti nabati a pakabuklanna.

Sika ket ngat ti init, ti silaw,
a manglawag ken mangpunno
kadagita a giwang
tapno mapagtalinaed a makaay-ayo.

Wenno siak ngata ti lawag
ket sika met ti atep
mabuteng a mapalukan iti natirad a lansa,
makirriit iti pudotko
anginga nga agsisinaka.

Ngem ti makunak laeng,
diak ammo no kayak nga isukat
ti agdama a pwestok ita
tapno makisinnukat kenka.


Sept 19, 2013

Desision

maysa a klase ti panagsalsal, 
sakbay a maragpat ti umno a resultana,
kasapulan a balabalaem, 
ay-ayamem iti suli ti panunotmo, 
tagikuaem ti tunggal bagi,
ti tunggal areng-eng 
nga iyed ti istruktura ti bagi, 
ket no madanonmo dayta, 
dita a magun-odmo
ti alimpatok,
ti panaparuar,
ket kunaem addaanka
iti naan-anay a gloria.


Sept 18, 2013

Ti Pagdianan

Idi nalpas a nakaykayan ti balasang a serbidora dagiti naiwara a parte ti plorera, pinunasanna ti danum a naiparsiak iti suelo tapno di a maikaglis dagiti kostumerda. Lumalabbasit pay laeng ti rupa daytoy gapu iti bain.

"Kasta a talaga, balasangko. Normal laeng nga agkammali ti maysa a tao. Iti maysa a kamali katukad ti maysa a leksion a pangatur kadaytoy." Impaganetget ni Nana Merced. Pampapigsa iti pakinakemna iti serbidora nga itan ket medyo napukawen iti panagnerbiosna.

Sinubadan ti balasang ti maysa nga isem. Idi nalpasna ti obrana. Insarunona nga innala dagiti tedda a makan iti mallukong ket inserrekna iti kusina. Ditana nga ikabil iti maysa a pagdianan.

"Ma'am, daytoyen ti take-outyo." Inyawatna ti maysa a supot a naglaonan ti makan nga iyawidda.

"Mabalin ti dumawat pay ti maysa a supot ket gangani dina malaon amin dagitoy." Insigidda nga imbilin ni Tata Carias.

"Aguray kayo 'garud, Tata."

Idi agsubli ket awitnan ti maysa a supot…

Sarsarita - 082513

ditayo koma ipilit nga iseksek ti banag iti espasio a di umanay kenkuana. Ta no inaramid tayo ti kasta, mabalin a madadael dayta a banag wenno ti lugar a nakapalawlaw iti dayta nga espasio.

(diak kukua ti ladawan)

Malagipko Pay

Malagipko pay no kaano
daydi kanito nga inseniasko kenka nga adda natnag
a kurimatmat iti pingpingmo.
Diak ammo no ania ti ibagak kenka idi.
Ibagak kadi nga adda natnag a sangga ti perlas
ket iti ania man a kanito iburuangna dagitoy
sigurado nga agayus, agtedtedda a situtudio,
aglalo ket diakon masbaalan
ti panaggungon ti barukongko.
Kasta gayam ti umuna a padas.
Makaamokan kunak!
Binay-ak lattan ti riknak ket pinuyotak
ti pingpingmo.
Natnag a naminpinsan iti nadam-eg a daga.
Ti daga ti mangikeddeng a mangalun-on
ti pagbanaganna.
Dita napakidemka.
Binay-ak manen ti riknak
ket diakon malagip pay ti simmaruno a napasamak.
Basta malagipko pay, ita ta sipsipawek
dagiti perlas ti maysa a bituen.

Ti Dara

diak kayat a makita ti dara ti kabagiak
ta kasla kitkitaek met ti darak
nga agtartaray kadagiti uratko
nga isuda a naggapuanna.
kaslada gamin danum ti karayan
a manglemmes kaniak ditoy baybay.

Panangakar

Saan nga umanay nga isangbayko kenka ti nabanglo a pay-ud tapno baliwak ti angotmo, tapno agbaliw met no ania ti agdadata nga addaanka, gayam mabalin a temporarioak laeng, wenno temporario laeng dayta, ta kalpasan ti maysa nga alimpatok, ti maysa a panagtipon, agsublinto latta no aniaka, ket amangan ta uray siak ket naakaranen iti ania man nga addaanka. Ta ti kinabanglo mabalin met a paksiaten ti kinabangsit.

Dagiti Dekorasion

Pinayapayan ni Nana Merced ti serbidora tapno ipakwentana no mano ti bayadanda iti naorderda.  Situtudio nga immasideg ti balasang nga iti panangtantia ti baket apagsagpatna pay laeng iti viente anos. Iti panagdardarasna, nasagidna ti plorera a nakaikabilan dagiti sabsabong. Nakaparabaw daytoy iti dibision tapno di makapagsinnirip dagiti dadduma a customer. Napataliaw amin a tao iti pannakabuong ti plorera iti sementado a suelo. Nagparsiak ti danum. Naimatangan ni Nana Merced ti panagbuteng iti rupa ti balasang. Ti natagari itay nga aglawlaw, nagulimek apagbiit. Insigida met nga immasideg ti superbisora ti panganan. Nakakuretret ti mugingna.

"Inka mangala iti pangkaykaymo tapno di maiwara dagiti babassit a banag ket di masugatan dagiti kustomer tayo. Inton maminsan, tanangem ti garawmo ta saan laeng a makadadaelka kadagiti banag nga adda ditoy uneg ngem amangan ta makadangranka pay." Naalumamay nga inmandar ti babai iti serbidora.

"Ma'am, pasensiaanyon daydiay taom…

Sarsarita - 061613

Kasla tudo ta nga agsupadi, 
maysaak a positibo (+) 
sika ket negatibo (-), 
iti tunggal agdekketta 
mangparnuayta iti gurruod ken kimat.


(diak kukua ti ladawan)

Sarsarita - 061413

No kayatmo ti dumket iti kudilko, tuladem koma ti lamok a sumayengseng sakbay nga agdisso tapno agpakada. Ta no diam inaramid dayta, amangan ta marim-itka.


(diak kukua ti ladawan)

Da'ta ti Pakasaritaan

Naidumduma dagiti dakulap
Diak ammo no ania wenno apay ken no sadino ti naggapuanda
Ngem makatugawak, mamatiak ken mabuyak
Dagiti ramay nga aggaraw tapno mangpartuat
Iti naidumduma a banag manipud iti awan
Agkumpas iti angin tapno iladawan ken biagenda ti sao
a tumpuar kadagiti bibig.

Adda dagiti pakasaritaan, adu a pakasaritaan ti kumuretreten a dakulap
Ken ti apagbingi nga isem no kasta nga agpilko ket agsabat
ti tammudo ken tangan.
Adda kadi makuna ti dakulap no kasta nga in-inut nga agkaem
Ti nagurdo, piniglat ken kuretretan a ramay.
Kaano kadi a dagiti ramay ket lumapsut manipud iti punguapunguan
Tapno agkedked uray iti maudi laengen a gubat ti panaglakay,
mapasamak ngata ti pakasaritaan?
Dagitoy a dakulap ket mapuoran, marunot, agrupsa
Ket agbalin a kas maysa a tapok.

Da'ta ti rurog! A no kaano a ti pambar ket agmawmaw
Ket dagiti maris ti biag aglingeda kadagiti kukota.
Da'ta dagiti ramay, natangken ngem nalamuyot
napigsa ngem nalukneng.
Da'ta! Ket kasla met kadakua…

Sarsarita - 060413

uray ti maysa kayo ket dina maipadto no agbalinto a nalinteg ngem maipanamnama dumakkel daytoy iti panaglabas ti panawen.

(diak kukua ti ladawan)

Sarsarita - 052513

ti tao ket kasla koriente, addan iti positive (+) ken negative (-) nga ugali ket no dadduma naka-neutral tapno ilingedna ti kinataona.

Bunga

Nakasanayadan nga agassawa a no malpasda a makimisa iti Domingo ket agtarusda iti panganan tapno agpalamiis. Maysa dayta a ritual kadakuada uray pay idi apagdennada kenni Tata Carias. Ken agpapan pay naadaanda iti annak agingga nga in-inutda a simmina kadakuada. Ita kasla kasta manen ti riknada. Kasla daydi umuna nga ibibisitada kadaytoy a disso itundada ida ita ditoy.

Iti panangiparada ni Tata Carias iti luganda, simmabat kadakuada ti maysa nga ubing tapno igiyana ida a nasayaat iti panagparkingda. Iti tantia ni Nana Merced agtawenen ti ubing iti pito. Rutay-rutay ti nangirngir a suot daytoy a bado a gangani dumanon iti tumengna. Madlaw la unay a saan nga umisu iti edadna. Lampong ti buokna a pangisiten ti kudilna ta amangan ket tinina ti asuk manipud kadagiti tambutso ti lugan.
Immuna a dimsaag ni Nana Merced.
“Sadinno dagiti nagannakmo, balong?” inimtuodna iti ubing.
“Adda sadiay, Nana.” Intudona ti lalaki a nakamasngaad iti sementado a pagmulmulaan iti masetas. Nakalinong daytoy …

Kalawakawak

Makitam kadi dagitoy nga adigik
Isu't mangtengtengel tapno makunaak a sibubukel. Umayka! Umasidegka tapno imutektekanak,  Riknaem dagitoy a diding a naitapkal kaniak
Tapno isu't mangsarsarapa iti bara ken lamiis
Manipud iti akinruar a puersa. Dagiti kortina nga uray napirpiranen, ay-ayamen latta ti angin. Maikarawam pay ngata dagiti ramaymo ditoy uneg? Tapno pasgedam ti pagsaingan
Ket ipintana manen ti anniniwanmo ditoy barukongko.
Adda dagiti kanito a kayatkon a maminpinsan nga iserra  ti ridaw ken ibalunet dagiti tawa, Pagtalinaeden ti ulimek.  Ngem diak malapdan a lagipen dagiti danapegmo,  Wenno dagiti agallangogan a pagaakmo.
Ken ti anangsabmo no umulika iti maikadua a kadsaaran. Napanunotmo kadi no ti ridaw ket awanan iti balunet?  Wenno dapan a sumrek? Kalawakawak ngem agang-anges ti adigik manipud ruar anginggat’ uneg. Sitatakderak nga agur-uray. Sitatalinaed latta ti bara ti katrek,  agat’ pay-ud latta ti maysa a balay. Uray no kasanot’ kaunday ti kinaawanmo  Wenno s…

Sarsarita - 032913

kasano kadi a maysaan ti pannakaidalit
wenno itarayan ti pannakaidasay tapno dinak bisitaen?
dumteng daytoy a di mapakpakadaan.
kas iti agtedted a tudo iti sayungan aglipias no mapno ti karamba.
wenno ti idadateng ti kalgaw a mangkiriit kadagiti bangkag
sumangbay a kas mannanakaw,
italawna ti mabalinna nga isikkarud.

- March 29, 2013

Kadagita Buokmo

Mas piliek iti malmes kadagita buokmo 
ta addaan daytoy iti mangiyaw-awan nga agis. 
Ti agpapada a langa, ti kinasileng, iti maymaysa nga angot. 
Ti tunggal nginabras ti pinuon nga iwalinko 
tapno sapulek ti ruangan a mangitunda kaniak iti naan-anay a gloria.


- March 27, 2013

Pasalip iti 2013 Palanca, Silulukaten

Open manen ti pasalip ita a tawen para iti Carlos Palanca Memorial Awards for Literature. Sigurado nga adu manen dagiti makipallot kadaytoy a prestihioso a pasalip iti literatura agalalo kadagitay kabanbannuaganna.

Padasentayo ngarud, kakadua ti makisalip bareng maaddaan met ti gundaway iti kas kadatayo nga agdadamo.

Para iti kompleto a detalye. I-download laeng ditoy dagiti pagalagadan:

CPMA Rules for 2013 ContestCPMA Official Entry FormCPMA AuthorizationConsent

Kadagiti amin a makisalip, goodluck amin kadatayo.

Sarsarita - 031613

Ti maysa nga arapaap ket addaan iti payyak, adda kenka no kasano nga iyampayag. No kasanom nga ipayakpak tapno maaddaan iti biag.


- March 16, 2013

(diak kukua ti ladawan)

Tagasarapa

Normal a buya ti pannakaintar dagiti lamisaan ken tugaw iti igid ti aplaya no in-inuten nga alun-onen ti danum ti bimmaawen nga init. Masuktan dagiti naguldagan iti maysa met laeng a banag a mangsarapa iti bantot ti bagi. Maakas a sangsangkamaysa dagitoy a kagiddan ti ariwanas iti ngatuen ti awan patingana a baybay. Agin-inut a masindian ti aplaya iti anaraar dagiti pasdek.

Kumarayo ti sardam kadagiti ellek dagiti agpapareha a mangin-intar iti nabara pay a baybay, a no sagpaminsan sabuaganna dagitoy saan a tapno tundayena ti panagdippit ti dua a bagi ngem ketdi tapno babasaenna ken paungarenna ti napino ken puraw a darat a nagsagaba iti agmalmalem a pannakaibilag. Kasla di maungpot dagiti tumarayutoy nga agkikinnibin. Agpaabagatan ken agpaamianan. Sangsangkamaysa dagiti maris ti nakset a kudil a nabulod manipud iti ari ti lawag. Kasla nagango a bulong a natnag iti darat. Dagiti dadduma saanen a madlaw ta tinayengteng idan ti sardam.

Kaamakko ti kasangsangok, maysa a tugaw nga awanan …

Riknaennak

ammok dinakto marikna,
ta awanannak iti nadagsen a danapeg
ngem sidadaanak a makigasanggasat,
no la ketdi makarayamak ta kudilmo
ket umanayen ti pannakaangotko ti pay-udmo
maipariknakto ti biag nga addaanak,
ti kinadakkelko babaen
kadagiti babassit a kinnit
ikkannakto met iti kanito
tapno rim-itennak
ngem umanayen kaniak dayta
ta ti nasisita naipariknak ti kinadakkelko
uray no bassitak iti panagkitam.


- March 11, 2013

(diak kukua ti ladawan)

Umuna Nga Aldaw Iti Paraiso

Daytoy ti umuna nga aldaw a panagdaliasat iti makunkuna a paraiso, ti isla ti Boracay. Iti kas kaniak nga agdamdamo iti daytoy a lugar, panagkunak kasla awananak iti Filipinas. Agduduma a puli ti makita ket no dadduma, ad-adu pay dagiti baniaga ngem kadagiti Filipino. Mabalin nga umuna a rason ket iti istilo iti panagbiag. Amin ket nangato ti kaibatuganna iti nakurapay a Filipino.

Para kadagiti baniaga, aglalo kadagiti taga laud, daytoy ti panawen tapno libasanda ti lamiis iti pagilianda. Kas kadakami met, linibasanmi ti pressure ti trabaho tapno uray iti apagkanito laeng ket ag-relax. Kasla panangibaba iti bagbagkaten a dagsen iti abaga.






Panagballasiw manipud iti ili ti Malay, Aklan

Maysa a parte ti trabahomi iti panagpasiar kadagiti kontruksion nga agkasapulan kadagiti silaw. Ket gapu ta nairana met a damotayo iti mapan iti Boracay, ginundawayanmi metten ti nagbaniaga ken i-enjoy ti panagbakasion.

Maysa a safe landing iti eropuerto ti Kalibo sadiay Aklan.

Ti entrada ti Jetty Port Terminal sadiay Caticlan.

Daytoy ti pangalaan iti pagluganan a ferry a mapan iti Isla ti Boracay.
Pagurayan iti uneg ti terminal.
Maysa kadagiti ferry boat a mangiballasiw kadagiti turista iti isla. Iti likud, ti maysa a RORO a barko ti 2GO a naggapu't Batangas pier.











Sarsarita - 030113

agtutot laeng ti kayo no tagbatem ti bagina ngem no rurosem ti bulongna kitam ket dina iginggina.


- March 1, 2013
(diak kukua ti ladawan)

Pannakabuong

Adda dagiti sumagmamano a banag
a kanito laeng ti makaibaga ken padas iti mangipalagip.
Umuna ken kaut-uotan kadagitoy ket ti pannakabuong.
Pannakabuong a kas maysa a baso
a maiwarsi iti sementado a suelo,
awanan rima ken awanan ti masinunuo a rason.
Di manamnama a dagitoy a naiwarsi a parte
ket nagtalinaedda iti lagip.

Ket daytoy nga aldaw,
kasapulan a pidutem dagiti babassit a sipang.
Saggaysaen a pagsasaipen dagiti genna ken birri,
dalusan dagiti natakem nga iking tapno pigketan,
isubli a sibubuo nga uray di mapaglunit
ti kinadaksanggasat ti pannakatnag,
mapagtalinaed a sibubuo


Amintayo ket addaan pannakatnag.
Mabuong ket mabuongto manen.
Ket no makita ti bagi manipud iti raniag
dagiti naiwarsi a banag di a masdaaw ta datayo dayta,
addaan iti agduduma a rupa a no matiruan iti silnag
mangiburay iti ad-adu a lawag.
Ti tunggal parte a mapidut,
makissayan ti anninaw.
Mapagkaysa agingga a maymaysa ti nakasango kadatayo.

-Feb 24, 2013
(diak kukua ti ladawan)

Sarsarita - 021913

Ti kape ket samo laeng maramanan ti imasna no ikiwarmo a nasayaat, kasta met ti biag, naimas daytoy no malaokan iti pait ti nasam-it.

-February 19, 2013

Iti Pila

Ita nga aldaw ket kadawyan laeng
 a kas iti pannakapirsay ti panid
ti kalendario iti diding iti napalpalabas,
agtangep dagiti ridaw
nga itay bigat ket sidadaan
a mangallawat kadagiti dumteng,
mapagpag ti tunggal pigad
a naglak-am ti pannakailuges
manipud iti sapatos, sinelas ken dapan
a di ammo no nagguapuananna,
basta ti ammok intunda ida
ti agduduma a deppaar
tapno makirinnapok, makipinnatangken,
makipinnakidser iti panagtatakder.


 (February 12,2013)
*diak kukua ti ladawan*

Sarsarita - 012213

sa mga obserbasyon ko ngayon lalo sa mga kabataan parang ang "sex" ay isang klase na lang ng apir o pagdampi ng dalawang hinliliit.

 - Jan 16, 2013


*immuna a naipost iti FB
*diak kukua ti ladawan

Sarsarita - 011913

no inpareserbam ti maysa a banag, pinakuyogam metten daytoy iti panagtalekda kenka saan laeng nga iti sao a pangiggamanda ngem agraman ti kinataom. 1-19-13

Sarsarita - 011513

ti kalsada ket addaan iti dua nga ungto, tapno agtugmok dagitoy kasapulan a pagsabaten iti tengnga wenno agsinnukon ti tunggal maysa.