Tagasarapa




Normal a buya ti pannakaintar dagiti lamisaan ken tugaw iti igid ti aplaya no in-inuten nga alun-onen ti danum ti bimmaawen nga init. Masuktan dagiti naguldagan iti maysa met laeng a banag a mangsarapa iti bantot ti bagi. Maakas a sangsangkamaysa dagitoy a kagiddan ti ariwanas iti ngatuen ti awan patingana a baybay. Agin-inut a masindian ti aplaya iti anaraar dagiti pasdek.

Kumarayo ti sardam kadagiti ellek dagiti agpapareha a mangin-intar iti nabara pay a baybay, a no sagpaminsan sabuaganna dagitoy saan a tapno tundayena ti panagdippit ti dua a bagi ngem ketdi tapno babasaenna ken paungarenna ti napino ken puraw a darat a nagsagaba iti agmalmalem a pannakaibilag. Kasla di maungpot dagiti tumarayutoy nga agkikinnibin. Agpaabagatan ken agpaamianan. Sangsangkamaysa dagiti maris ti nakset a kudil a nabulod manipud iti ari ti lawag. Kasla nagango a bulong a natnag iti darat. Dagiti dadduma saanen a madlaw ta tinayengteng idan ti sardam.

Kaamakko ti kasangsangok, maysa a tugaw nga awanan anniniwan. Di man laeng agkir-i no agparsiak ti dumarup a danum. Wenno di man laeng agtung-ed no tanggayak ken datonak iti sangabotelia sako ipisok iti basona. Awanan gaganaygayan, awanan biag. Bay-anna ketdi nga agawaaw ti espiritu tapno agayab ti kadduami. Espiritu manipud kadagiti niyog a di man laeng nakaraman iti panaginaw. Ta sigud a maburas, sigud a maipaikkat. Maaborsiada manipud iti palatangna tapno di matinnagan dagiti gangganaet iti sirok. Ta ania kadi ti akemda ditoy lubong, no di ti mangsarapa iti bara. Tagasippaw. Tagasarapa.

Naanus ketdi ti kasangsangok ta kinadduanak iti panakalukat ti bote ti serbesa ket binay-anna a ninamnamko ti tunggal pait ti napudotan a likido nga agburburek ti tunggal pannakaguted-guted ti sarming.

Mangrugin a manglapunos ti baybay. Dua laeng nga aksaw manipud iti nagtugawanmi. Ngem ti oras di pay malapunos. Di pay linemmes ti agwanwanawan a santilmo dagiti binukel ti matak. Agkaiwarada ditoy sangok ken iti ig-igid. Ti bagik di pay nalapunos iti pannakawaw. Pannakawaw saan a gapu ta diak imminum ti danum iti agmalmalem. Ngem mawawak kadagiti lagip. Mawawak a saggaysaen nga ukagen ken warwaren dagiti naikutkot a pagteng. A kas kadagiti naikutkot a plastik a pagdianan ti danum a kinurukoran ti baybay. Agtatapawda ita kalpasan nga inwalin ti dalluyon ket saggaysaenna nga ilallay. Kas met ti panagtapaw ti simut-simot iti baso. Idatonda ti biagda iti apagbiit a bara.

Pinayapayak ti tagaserbi manipud iti pagur-urayanna iti sango ti kahera. Pinagdippitko nga insenias iti ngatuen ti ulok dagiti tammudok ken tangan dagiti dakulapko sako met laeng pinagsina. Nagtung-ed. Am-ammona la unay dagiti wasiwas ti angin. Dagiti tung-ed adda kaipapananna. Adda dagiti senias a di kasapulan iti balikas. Diam kasapulan nga isawang. Umanayen dagiti mata. Ta kasta ti nakaparsuaan. Dita ti nanipudan iti amin. Uray itay nagtugawak a mangrugi nga agluom ti malem ken main-inaw ti sardam, intudok laeng ti ladawan a naglaon iti innem a bote ti serbesa sako inunnat ti tammudo a tanda ti maysa. Apagbiit addan iti sanguanak.

Inukagko dagiti naikur-it. Tallo gasut katukad ti tallo oras a pangbayad iti bukodko a ragsak. Imbatiak ti sobra-sobra iti nailanad iti sangkapirgis a papel. Pinapel a katukad ti maysa a papel. Papel a katukad ti ragsak. Ragsak a diak binirok basta ammok narabaw ti amin. Adda ragsak ngem saan a naan-anay. Parparapaw. Saan a nabukel. Agkurkurang. Agtatapaw.

Iti itatakderko, natulid ti nangsarapa iti bagik manipud iti nakailumlumanna a darat. Nattuang ngem binangon ti tagaserbi. Pinidutko ti sinelas a nangsarapa iti sakak. Sinaggaysak a pinasayag nga impakamakam iti immadayu a dalluyon. Iti abayko tinuladnak ti kadduak. Nagussubak ket awan ti imbatik a gargaret iti bagik. Sinarabok ti baro a nabalkot a dalluyon ket nagpaiyanodnak.

- March 15, 2013

Popular Posts